News

J.Malsawmzuala Vanchhawng, Adcovate in RTI hmanga zawhna a siam, a huna chhan a nih loh vang leh chhanna a dawnah a lungawi loh thu a thlen (Appeal) chu Mizoram Information Commission full bench chuan 9.4.2026 khan a ngaihtuah a, Hearing-ah hian complaint thehluttu leh Mizoram State Health Care Society SPIO leh RTI zawhna luh hunlaia SPIO te an inlan a, Mizoram Health Care Society leh Synod Hospital ten MUHCS kalpuina tura inremna an ziah copy leh detail pricing chu 17.4.2026 ral hmaa Complainant hnena a thlawna pe turin State Information Commission hian SPIO chu a thu a pe a ni.
MUHCS kalpuinaah mipui sum (public money) hman a ni chungin sorkar chuan thup tam tak a nei niin Complaint thehluttu hian a sawi a, Mizoram Health Care Society in Damdawi In hrang hrangte inremna a ziahpuiah thuruk anga vawn tur tih tarlanna ‘Confidentiality Clause’ dahlut telin, hemi behchhana hmang hian Damdawiin hrang hrang nena inremna an siamte chu mipui hriat theih loh turin an thup tlat a. Mizorama Private Hospital-te pawhin Mizoram chhung leh pawn lam Pvt. Hospital dangte leh sorkar inremna siam dan an hriat theih loh avangin vawiin thlengin MUCHS an zawm theih loh phah a, a tuartu chu MUHCS zawmtu, sorkar hnathawk, pensioner leh mipui nawlpui, damlote an nih leh si avangin Appeal hi a thehlut tih Complainant hian a sawi.

Inremna-a Confidentiality Clause dahluh tel chu Dan kalh a ni tih Complainant hian a sawi a. Hemi tlawhchhana thuneituten RTI zawhna an chhang duh lo leh, Mizoram Assembly-a MLA te zawhna hialte pawh sorkarin a chhang duh lo chu Right to Information Act, 2005, bawhchhiatna a nih avangin State Information Commission-ah hian a zualko ta tih a sawi a, thutlukna siam tak chu Dan rorelna vawnhimna, mipuite tana hlawhtlinna nasa takah a ngai tih complaint thehluttu hian a sawi.

State Information Commission in Order a tih chhuah takah hian Court ruling lo awm tawh chi hrang hrangte tarlangin, SPIO chu tunhnuah a hun taka information pe chhuak turin a hriattir a, MUHCS chu mipuite hamthatna tura duan anih avang leh mipui sum hmanna a nih avangin, Synod Hospital nena inremna ziahte bakah MUHCS kalphung leh a nihphungte chu thup tum lova mipuiten awlsam taka an hmuh theihna tura website ah pawh upload zawk tura beisei a ni tih a tarlang a ni.