MIGAHTA-in sorkar notification an hal

Mizoram Govt. Adhoc Aided High School Teachers’ Association (MIGAHTA) huaihawtin vawiin (August 5, 2026) hian Mizoram hmun hrang hranga adhoc high school 90 chuangah adhoc high school-te dinhmun hniam zawka dahna notification an hal a, naktuk atangin tiamchin awm loa mass casual leave lak an tum.

MIGAHTA tarlan danin, khaw tam takah he notification halna hun hi managaing committee, All NGO leh VC-ten an hmanpui a ni. Provincialised an nih tawh ang ngeia provincialised dinhmuna min dah let leh tura sorkar an nawrna leh tuna an dinhmun adhoc-grant-in-aid atanga dinhmun hniam zawk lump-sum-grant-aid(Category S1) a sorkarin dah a tumna dodalin lungawi lohna July 21, 2026 atang khan kan lantir tawh a ni.

Hetianga sorkar kara lungawi lohna kan lantir mek laiin July 29, 2026-a Vanapa Hall kawta sit-in demonstration kan neih tumin MZP palaina hnuaiah, Education Minister hriatpuinain sorkar aiawh Adviser to CM Lalmuanpuia Punte, ZPM Vice President ni bawkin a sawm angin, a office-ah MZP hriatpuinain inbiakna boruak tha tak hnuaiah an nei a ni.

Inbiaknaah sorkar laka lungawi lohna an lantir mek chu titawp tura ngen an ni a, sorkar laka kan lungawi lohna leh kan thil phut hrang hrang kan sawite chu August 12, 2026 a PAC meeting-a ngaihtuah Adviser to CM-in a tiam ang leh sorkar nen inbiakna an neih leh hma chuan adhoc high school-te dinhmun hniama an tlakna tur Category S-1 notification tichhuak lo tura thuneitute ngensak tiam an nih avangin, sorkar ngenna zahawm an tih avangin July 30, 2026-ah sorkar laka lungawi lohna an lantir mek sit-in demonstration chu an call off ta rih a ni.

Hetianga an chungchang PAC meeting-in a rel tur an ngaihchanlai leh an ngen anga adhoc high school-te dinhmun hniama an tlakna tur Category S-1 notification tichhuak lo tura an ngaih lain; an inbiakna bawhchhia a, notification tihchhuah hnan an duh lohna entirnan he notification hi an hal ta a ni.

Vawiina MIGAHTA executive meeting chuan sorkarin provincialised dinhmuna dahlet leh turin an phut a, tuna an dinhmun adhoc-grant-in-aid atanga dinhmun hniam zawk lump-sum-grant-aid (Category S1) a sorkarin a dahna notification August 4, 2026-a a tihchhuah tawh chu cancel a nih hma chuan naktuk August 6, 2026 atangin tiamchin awm loin mass casual Leave an la dawn.

Tin, August 7, 2026 hian Mizoram hmun hrang hranga adhoc high school-te chuan an mahni veng leh khua theuhah school dinhmun tlakhniam tir a nih chungchangah managing committee, VC leh All NGO te nen Joint Meeting nei turin ruahmanna an siam.

MIGAHTA chuan school dinhmun a hniam zawnga indah sak hi an pawm thei ngai dawn loh thu leh a tawp thlenga an do dawn thu an tarlang.