MIMA-in Bawngkawn LC-te an tlawh

Sumdawng intelkhawm, Mizoram Merchant Association (MIMA) OB-te chuan nimin (12.8.2026) khan Bawngkawn Local Council office tlawhin, an hmalakna, Bawngkawn area huam chhunga dan loa hnamdang dawrkaite leh Mizo hming hawh a dawr neite duh lohna leh tihtawpna tura hmalakna an thlawpzia lantirin, lawmthu an hrilh.

MIMA tarlan danin, an inkawmnaah Bawngkawn LC-in hma an lak dan tlangpui leh hmalak zel an tum dante report an ngaithla a ni. MIMA hruaitute pawhin kum 2011 atanga hemi kawnga hma an lo lak tawh dante tarlangin, thil hrang hrang an sawiho.

Bawngkawn LC-te hmalakna hi hnam tan a pawimawh em em tih tarlangin, “Mizote eizawnna kawnga chimral kan nih lohna tura kawng awm chhun a ni,” an ti.

Bawngkawn LV leh MIMA hian Chhinga Veng Local council kaihhruainain Chhinga Veng all NGO-te an area chhunga hma an lakna hlawhtling chho dante an sawiho a, hetiang hmalakna hi veng tin leh khawtin hmalak nan hmang thei zel se Mizoram tan a that dan turte an sawiho nghal.

MIMA chuan, Bawngkawn Local Council hnenah Rs 10000 lawmthu sawi nan leh an thlawpzia lantir nan an hlan.

MIMA hruaitute chuan, hemi chungchangah an tangkai theihna ang ang ah an hnungah an ding tlat tur thu Bawngkawn LC-te an hrilh.