MIMA-in Chhinga Veng an fak

Sumdawng pawl intelkhawm Mizoram Merchant Association (MIMA) chuan thuchhuah siamin, Chhinga Veng Local Council leh NGO – YMA, MUP leh MHIP-te chu dan loa sumdawngte laka an hmalaknaah an fak.

MIMA chuan Chhinga Veng LC leh NGO-te hian October 18 -20, 2025 chhung khan an veng chhunga dan lova sumdawng te, Mizo hming hawha sumdawngte leh an work purpose ang loa sumdawngte check-in, mi 5 an hmu chhuah tih tarlangin, ‘October 2025 chhunga an dawr ti tawp turin an ti. Hetianga hma an la hi a ropui tak zet zet a, Mizorama sumdawngte leh kan hnam tan a hlu takzet. Lawmawm kan tiin an hmalakna kan thlawp takzet zet a ni,’ an ti.

Mizoramah sumdawnna kawnga inchim ralna (economic assimilation) a thleng mek zel tih tarlangin MIMA chuan, ‘A bikin iron rod leh cement zuar bikah phei chuan mizo dik tak hi a zuarteah hian 20% pawh an awm tawh lo niin AMCIRDA hruaitute chuan an sawi a ni. Tin, eichawp zuar dawr lian tam tak pawh hi hnamdang leh Mizo hming hawh an tam hlein kan hria,’ tiin Chhinga Veng LC leh NGO-ten chimral kan nih mekna ata chhan chhuah hna an thawk tih an tarlang.

MIMA chuan Mizoram khaw tin, Aizawla veng tinin ti ve thei ila an duhthu tarlangin, ‘Kan puan ven sawichhing thar lehin kan ke te pen chhuak thei ila tiin kan ngen a ni. Tin, building neitute pawhin kan building dan loa sumdawng luahtir lo tur leh, hnamdangte luahtir lo turin Mizo mipuite kan ngen tak meuh meuh a ni. Kan State thenawmte hi sumdawnna kawngah chimral an ni deuh vek tawh tih kan hria a, hawh u Mizoram hi kan ram a ni. Chimral kan nih ve mai loh nan tan la thar ang u,’ an ti.