Minister-in lungphum a phum

Vawiin (17.8.2026) hian Urban Infrastructure Development Fund (UIDF) sum, cheng nuai 200 senga Lunglei Park (Chanmari, Lunglei) cheiṭhat hna thawh tur lungphum chu Minister Lalrinpuii, Lunglei East Bialtu MLA-in a phum a, Lungleiah skywalk siam tum a nih thu a sawi.

Lungphum puala UD&PA Office-a inkhawm buatsaihah Lalrinpuii chuan, “Lunglei khawpui hmun hlui pawimawh, Tarmita Khawthlirah Skywalk siam tum a ni. Ministry of Tourism hnuaia Pilgrimage Rejuvenation and Spiritual Heritage Augmentation Drive Scheme aṭangin cheng vaibelchhe 3 chuang project buaipui mek a ni a, a hlawhtlin ngei kan beisei,” a ti.

Minister chuan Lunglei mawi taka siam turin LMC lam thawhpuina leh enkawlna hnuaiah hma lakna hrang hrang kalpui chhoh tum a nih thu sawiin, “Sum leh pai leh ruahmanna chungchangah UD&PA lam nen inrawn tlanga hma lak a ni. UIDF hnuaiah pawh hma lakna dang tam tak a la awm,” tiin UIDF hnuaia hna thawh chu a enkawlna tur mahni inchawm thei (sustainable) a nih a \ul avangin Lunglei khawpuiah man chawia hman theih inthiarna, Pay & Use Toilet te pawh sak tum a nih thu a sawi.

Lunglei Park chei ṭhat hna hi UD&PA Department enkawlna hnuaiah thawh tur a ni a, a thawk turin A3 Design Build, Zonuam, Aizawl te thlan an ni. Hna hi July 30, 2026 khan ṭan niin, thla 18 chhunga zawh tur a ni.