News

Mizoram Civil Service Association (MCSA) chuan vawiin (24.11.2025) hian Aijal Club-ah conference vawi 49-na, McCabe Hall, Aijal Club-a hmang a, DP&AR Minister K. Sapdanga’n khuallian niin a hmanpui a, MCSA buatsaih 11th Edition RAHBI Magazine a tlangzarh nghal.

DP&AR Minister chuan state dang kalphung tha zâwk angin, mipuite tana awlsam nan leh rang zawka service pêk chhuah a nih theih nan district administration-te chu mini-secretariat anga hnathawk (function) turin kalpui tum a nih thu sawiin, “Sorkarun hma a la chho mêk. Thil eng emaw tih dawn hlek a, thingtláng kilkhâwr zawk atanga Aizawl pan ngai kher loin, district headquarters-a tihfel mai theih turin power pawh hi semzai a ngai. Decentralization of power tih dawn hian sorkar hnathawk thenkhat zingah pawh ui tlat, phal tlat lo, harsatna hlîr ngaihtuah a awm theih a, chung pawh chu ram tana tha tur a nih chuan kan pal luih deuh pawh a ngai ang,” a ti.

MCS officers-te chu mi dang tana nu leh pa chan chang thiam zel tura chahin K Sapdanga chuan, MCS kherna leh sawiselna awmte chu kher lêt ve zel loin, mahni insiamthat tûlna a awmna lai apianga insiam thatna atana hmang thiam turin fuih a, “Mi dangin darkar 5 an thawh chuan MCS officer chuan darkar 7 thawh tur a ni. Mi dang aia thawh tam te, zaidam te, ngilneih te, tlâwmngaih te, rinawm te, hriatthiamna neih te, mi dang thawhpui thiam te, mi dang aia hriatna zau zawk neih te hi ‘premier service’ quality chu a ni. Kan rilru sûkthlêk leh mi dangte nen kan inlaichinnaah hian inti lal taka va rah beh a ngai lo a, kan thinlung leh mite thinlungah hnathawh leh nungchang hmangin ‘premier service’ tih hi tuh zawk tur a ni. Mi dangte aiin in nungchang hi miin an thlîr bîk a, mi dangin an tih, an sawisel lem lohah pawh MCS tih a nih chuan a langsâr hma bik thin. Vawi khat hming chhiatna neih tawh chuan, tui bua ruh harsa tawh ang hi a ni thin,” tiin nungchang uluk taka hman a pawimawh thu a sawi.