News

Nimin (23.6.2026) khan Industrial Training Institute (ITI), Aizawl-ah LESDE Minister Lalnghinglova Hmar chuan New Age Technology Skill Lab a hawng. Skill Lab hawnna inkhawmah hian Adviser to CM & CSR Cell Chairman TBC Lalvenchhunga chu special guest niin, Bharat Forage Vice President & Head CSR Dr. Leena Deshpande chu khualzahawm a ni.

Skill Lab hawnna inkhawmah hian Lalnghinglova Hmar chuan thu sawiin, “Bharat Forge-te nen thawkhova New Age Technologies zirna Skill Lab din a ni hi a lawmawm. Mizoten man țangkaipui ngei ka beisei. Thawhhona tha chuan thil tam tak a thlen thei a, skill lab hawn a nih theih chhan pawh thawhhona tha tak a awm vang a ni. Mizoram tan hmasawnna a nih ngei ka beisei. Hei hian zirna hi a thlak danglam thei dawn a ni,” a ti.

LESDE Minister chuan thiam bik (skill) neih a pawimawh thu sawiin, “Mi tam tak chu lehkha zirna lamah sang tak thleng thei lo mah se, thiam bik an neih chuan eizawnna atan a hman theih. ITI hi chutiang atan chuan a pawimawh hle a ni,” tiin skill lab bungrua tha tak tak hmang hian thiamna tha tak tak nei an chher chhuah zel a beisei thu a sawi.

TBC Lalvenchhunga pawhin thu sawiin, skill lab tha tak mai Mizoramin a nei thei chu lawmawm a tih thu sawiin, zirlaite chu an vanneihzia hria a, theihtawp chhuah turin a fuih a, thiamna rintlak zirchhuahpui ngei turin a chah. Bharat Forge-te nen thawk hova hetiang technology zirna skill lab din a lo ni ta chu lawmawm a tih thu leh roh taka enkawl tura a duh thu sawiin zirlaiten țangkaipui ngei tura a duhsak thu a sawi bawk.

Mizoram sorkar leh Bharat Forge-te chuan thawk dunin CSR kaltlangin he fechnologies lab hi an din a ni. Bharat Forge hnuai atang hian Simusoft Technologies te chuan skill lab din hna an thawk a, software hmanga robot khawl chi hrang hrang hnathawk thei tura design dan zirna a ni. Industry lian tak taka khawl hmanga hna an thawh dan te, mamawh dan a zira khawl siam dan turte he skill lab atang hian an zir dawn a ni.

He project ITI Lab hi Confederation of Indian Industry (CII)-in Mizorama CSR program an buatsaih atanga lo intan niin, CII chuan over all coordination hna a thawk bawk ani. CII kaltlang hian project dang Mizoramah thawh mek a ni a, hmachhawp tamtak ala awm mek bawk a ni. CII chuan India ram hmun hrang hrangah hma ala mek a, CSR fund tam zawk Mizoramah a lo luh theih nan CII chuan hma a la mek bawk a ni.