Dec 08, 2025
Monday
Vawiin, December 8, 2025 (Thawhtanni) hian MPCC chuan Congress Bhavan Golden Hall-ah political session an hmang a, thusawitu Dr.Lallianchhunga, MPCC Spokesperson (Thupuangtu) chuan kum 2028 a ZPM Sorkar thlak turin mipuiten MNF aiin Congress an duh zawk thu leh sorkar siam tawh zinga mipui nin hma ber chu ZPM an nih thu a sawi.
Dr.Lallianchhunga chuan, “ZPM enchhin sorkar kan hrawn mek hi Mizorama sorkarna siam tawh zingah mipuiin an nin hma ber sorkar a ni. Kum 2028 inthlanpuia ZPM thlak tur hian mipuiten MNF aiin Congress hi min duh zawk. A chhan chu, MNF a sorkar leh palh chuan sorkar hnathawkte’n a hun takah hlawh an la thei lo leh anga, Mizo nationalism aiin Kamrul-a contract thawh tur an buaipui leh zawk anga, politics hmanga Hindu sakhua sawhngheh tumtu Central BJP tha ti chak turin hma an la leh dawn tih Mizoram mipuite hian an hria a ni,” a ti.
Kum 2018-2023 chhung khan MNF-in an intiamna tihhlawhtlin an nei lo nia sawiin MPCC Spokesperson chuan, “Nuai thum min tiam a, Traffic jam awm lohna khawpui min tiam a, kawng chhawng min tiam bawk a. Hengte hi tihhlawhtlin an nei lo. Kum 2028 inthlanpui kan hmachhawn turah MNF te hian inzawrhna tur engmah an nei tawh lo a ni,” tiin Congress Party in kum 2008-2018 chhung khan sorkar rintlak, mipuite innghah ngamna tham sorkar a lo siam tawh thu a sawi.
