Mizo inneih leh rokhawm dan ennawntute thukhawm

Vawiin (15.4.2026) chhun khan Mizo Inneih leh Rokhawmna Dan ennawntu Review Committee chu an chairman Zahmingthanga Ralte, Law & Judicial addl. secretary hoin Chief Secretary Conference Hall-ah an thukhawm.

Assembly Session hnuhnung berin a pass, Mizo Inneih leh Rokhawmna Dan siamthatna – The Mizo Marriage and Inheritance of Property (Amendment) Act ah Mizoram mipuite zingah ngaihdan hrang hrang, a thlawp zawng leh sawiselna lamte a piang ni.

Mizoram Sorkar chuan heng ngaihdan leh sawiselna awmte hi a dik leh dik lote zirchianga, engtia kalpui tur nge tih uluk taka zir tura a tih angin Review Committee thutkhawm hi koh a ni. MHIP-in Assembly Speaker hnena an lungawi lohna leh en tha tura an ngenna lehkha leh Val Upa Council-in Chief Minister hnena enthat an ngenna leh rawtna an thlente pawh a tel.

Review Committee Chairman chuan sawiselna leh ngaihdan hrang hrangte chu uluk takin zir a nih thu sawiin, “A then chu thil niawm tak ni a a lan laiin, tam tak sawiselna erawh thil hriatchian tawk loh vang a ni. The Mizo Marriage and Inheritance of Property (Amendment) Act, 2026 chu Mizoram Gazette-ah March 6 khan chhuah niin hemi ni atang hian hman nghal a ni,” a ti.

Kohhran hrang hranga inneihna kawltu zawng zawngin an hriat tur chu, he dan hnuaiah hian nupui pasal then tawhin midang an neih leh dawn chuan court atangin divorce certificate an neih ngei ngei a ngai tih a nih thu sawiin Zahmingthanga Ralte chuan, “Chutiang nei loa nupui pasal dang nei chu BNS Sec.82 angin kum 7 thleng lung in tan leh pawisa chawia hrem theih an ni dawn,” tiin fimkhur taka inneihna kalpui turin kohhrante a chah.

Vawiin thukhawmah hian Mizoram Kohhran Hruaitute Committee (MKHC), Council of Churches in Mizoram (CCM), Mizo Language Development Board, MHIP, MUP, Women Commission, Bar Association bakah mi thiam leh tui mite an tel. Chairman chuan Mizo chhungkaw tin leh mimal tin khawih thil ngaihtuah a nih avangin fimkhur leh uluk taka ngaihtuahna seng turin a chah a, meeting neih leh huna thutlukna tha tak siam thei turin member-te a chah bawk a ni.