Mizo khawsak phung ngai pawimawh turin khualzinte phut

Mizo Zirlai Pawl (MZP) chuan thuchhuah siamin, Mizoram rawn tlawhtu (tourist) hrang hrang lo pung chho mekah, khualpang zin leh thildanga Mizoram rawn tlawhtute hian thil an hriat ngai leh an fimkhurna tur awm nia an hriat thu tarlangin, “Mizo nunzia leh khawsakphungte an ngaihpawimawh leh zah kan beiseiin a phut tlat a ni.

Hnamdang (tourist) Mizoram rawn tlawh social media leh thil dang danga thehdarh tur digital content siamte chu Mizo hnam, sakhua leh khawtlang timualpho thei tur chu siam lo tura chahin MZP chuan, “Mimal in leh biak inahte video emaw thlalak pangngai emaw pawh ni se, phalna nei lo chuan pawng lak mai mai lo tur leh Mizoram la rawn tlawh leh zel tur te pawh, Mizo min hmuh dan a dik lo zawnga a hruai theihna tur thilah phei chuan fimkhur hle turin kan hriattir a ni,” tiin mipui nawlpui awm dan leh nunphung pangai aia uchuakin khawiah pawh awm lo turin an ngen.

MZP chuan hmeichhia leh hmeichhe naupangte hi an thla emaw video emaw la a, mi ngaihdan hruai kawi thei tur zawnga pholante an duh loh thu tarlangin, “Khawlai ilo a hmuh remchan apiang kawm a, Mizo chanchin a hluhlang zawng leh kimchang lo thehdarh zui pawh kan rem ti lo a ni. Mizo chanchin ngaihven leh hre chiang duh chuan thil hre zik tluak leh puitling deuhte atanga thil ngaihven hram hram turin khualzinte kan ngen. Mizote hi chuan hmeichhia leh naupangte hi kan humhalh a, an laka nungchang mawi lo taka lantirtute chu a en liam mai mai dawn lo,” an ti.

MZP chuan, “Mizoram rawn tlawhtute chuan hei hi a hre reng tur a ni a, vantlang mithmuha mawi lo leh mit ti kham zawnga awm loh tur a ni. Tu pawh, eng hna thawk mi pawh Mizoramah chuan kan inzahtawna, taxi driver, two-wheeler taxi driver leh service provider tu pawh zah pah lo taka tih mai mai kan remti lo. Mizorama chengte hian khawsakho leh nundan mawi danglam tak kan nei,” an ti a, mite hmuh atan an chhuan thu an tarlang.

Mizoram rawn tlawh pawp a, kan ram leilung mawi leh boruak thianghlimte rawn chhim duh tan an rilru zau taka a inhawn thu tarlangin MZP chuan, “Mikhual duat leh zah hnam pawh kan ni a, tourism lama sorkar hmalakna pawh kan thlawp hle a ni. Mah se, mikhual laka that kan chhuahnate leh mikhual kan lawm viau avanga hian min zuam phah tur a ni lo,” an ti.

MZP chuan Mizoram rawn tlawh tur reng reng chuan Inner Line Permit (ILP) neih ngei ngei tur a nih thu tarlangin, “Temporary ILP hi awlsam takin a lak theih bawk. Mahse, hei hi sumdawn phalna emaw, hnathawka inhlawh phalna emaw a ni lo tih hriat tur a ni,” tiin Mizoram tlawhtute reng reng chuan ILP an ngai pawimawh tur a nih thu an tarlang.