Mizoram Labour Link app tlangzarh

Vawiin (13.5.2026) chhun khan Labour, Employment, Skill Development and Entrepreneurship (LESDE) Minister Lalnghinglova Hmar chuan ‘Mizoram Labour Link’ mobile app chu LESDE Auditorium-ah a tlangzarh.

Lalnghinglova Hmar chuan khawvel thiamna ṭhangzel banpha tur leh tel ve thei tura Mizoram mipuite tana ṭangkai tur Mizoram Labour Link mobile app a tlangzarh thei chu lawmawm a tih thu sawiin, “Tunlai khawvel intlansiakna ber, hmasawna min thlentheitu ṭangkai tak ni bawk chu digital infrastructure hi a ni. Mihring thiamna tihpunna chu Digital World-ah a awm a ni,” a ti.

Mizoram Labour Link Mobile Application hi ni tin inhawhfa thinte (daily labourer/workers) leh a chhawrtu tur (employer) indawr tawnna tur (digital platform) atana duan a ni. He application in a tum ber chu:

1.Pawnlam mi (middlemen) inrawlhna tih tlem.

2.Hnathawh tur zawnga hmun him lo laia Workers/Labours-te fuankhawmna tih bo.

3.Ni tin inhlawh thinten an thawh hlawh dik tak (fair wages) langtlang taka an hmuh theihna tura duan a ni.

He application hi a hmangtuin awlsam taka an hman theih tura duan a ni a, hna zawngtute leh a chhawrtuten awlsam takin an smartphone kaltlangin direct service an hmu thei dawn a ni.

Mobile Application tih theih thenkhatte:

1.Hna zawnglai (worker) leh a chhawr theitu tur (employer) inziahluh theihna.

2.Hna tarchhuah (job posting) theihna leh dil theihna.

3.SMS leh Push Notification hmanga inhriattir theihna.

4.Hna zawngtu leh hnathawh tur neitu inbiakpawh theihna.

5.Awmna hmuna zir (location based), leh thiamthil bik (skill based) a zira hna zawnna leh tarlanna.

6.Mobile application hmangtu account nemnghehna leh venhimna (user authentication & authorization).

He platform hi mobile application chauh ni lovin, Mizorama nitin inhawhfa thinte leh a chhawrtute indawrtawnna awlsam zawk leh technology-driven labour ecosystem dinna tur lungphum a ni. He application hi tihchangtlun chhoh zel turin an ruahman.