News

Mizoram Police chuan H Ramdinpuii (15), Mualthuam North thih chungchangah thuchhuah an siam a, tualthahnaa pawikhawihtu nan chhuah tuma an beih mek thu an tarlang a, thu belhchian dawllo thehdarh lo turin mipui an ngen.

Mizoram Police thuchhuah :

Ni. 3.8.2026 (Thawhtan) zan dar 08:30 vel khan H.Lalramdinpuii (15) d/o H.Lalawmpuia, Mualthuam North chu an in atanga a chhuak chin hriat lohin a bo a ni. Khawtlangin ngawrh taka an zawn hnuin ni 5.8.2026 zing dar 10:20vel khan Govt Middle School, Mualthuam North compound-ah thia hmuh a ni a, hemi
chungchangah hian Lunglei Police Station C/No. 84/26 Dt. 05.08.2026 U/S 103(1)/140(1) BNS ziah luh a ni.

He thil thleng hian police beng a thlen veleh rang takin SDPO leh a team te bakah Forensic lamte a hmunah kal nghalin inquest leh a hmuna tih tur tulte tih nghal a ni a, a tuk ni 6.8.2026 ah ruang hi Civil Hospital, Lungleiah PME neih a ni.

Mizoram Police chuan he thihna hi pawi kan ti takzet a, thubuai ziah luh a nih veleh a chhui turin Lunglei Police hnuaiah a hnuaia tarlan ang hian Special Investigation Team (SIT) din nghal a ni.

S.I.T Leader : R. Lalthankima, SDPO Lunglei. Team member-te 1) S.I ZD Lalremruata, Lunglei PS. 2) ASI David Rodingpuia, Lunglei PS

S.I.T hi Mualthuam North-ah inkhuar nghalin ngun tak leh uluk takin hnuchhui hna an thawk nghal. Tun dinhmunah rinhlelh thua man an la awm rih loa, theihtawpin he tualthahna runthlak taka pawikhawihtu hi man chhuah tumin
beih mek a ni.

Hemi chungchangah hian thu belhchian dawl lo thehdarh lo tur leh police hnuchhuina tikhaihlak zawnga khawsa lo hram turin mipuite kan inngen a, pawikhawihtu man chhuahna kawngah theihtawpa police-te min thawhpui turin kan insawm a ni.