Mizoram Science Award hlan

Vawiin (13.5.2026) hian Mizoram Science Society (MSS) chuan Aizawl Hospital- ah, Mizorama a hmasa ber atan Dr. LN Tluanga, Mission Veng hnenah Mizoram Science Award an hlan.

Mizoram Science Award hi Mizote zinga science leh a kaihhnawih lama khawtlang leh ram tana hnuhma nei tha te, scientific research lama mi hming tha leh thawhhlawkte hnena hlan thin tura Mizoram Science Society (MSS)-in a duan niin, a dawng hmasa ber tur atan Dr. LN Tluanga hi thlan a ni. He award hian Rs 50,000 keng telin, Dr. LN Tluanga hi a taksa a chak loh ve deuh tawh avangin Aizawl Hospital-ah enkawl mek a ni a, award pawh hi damdawi inah hian MSS hruaitu-ten an hlan.

Dr. LN Tluanga hi kum 1933 khan Bukpui khuaah lo piangin, Sialsuk leh Aizawlah te a naupan laiin lehkha a zir. BSc chu Scottish Church College atangin 1955 khan mathematics subject-ah distiction-ah a passed. BSc a passed hnu hian sikulah kum 1 thawkin MSc a zir chhunzawm leh a, a hnu deuh kum 1974 khan Gauhati University hnuaiah PhD zovin Mizo zinga mathematics subject-a PhD nei hmasa ber a ni nghe nghe.

Mizoram Sawrkar hnuaia Education Director hmasa ber niin, a hnu lamah pawh Education Department hnuaiah vek hian consultant/adviser hna a chelh leh. Science tih hmasawnna kawngah nasa taka thawktu niin Mizoram Science Society pawh hi ama hoa kum 1979-a din a ni.