Mizoram State Policy Coordination Committee

Vawiin (12.6.2026) hian Planning & Programme Implementation Conference Hall-ah Chief Minister Lalduhoma hoin Mizoram State Policy Coordination Committee-te an thukhawm a, Bana Kaih kalpui tawh chinte thlirletin, kalpui zel turte an sawiho.

Meeting-a tarlan leh relte :

CM Special Package phase 1 ah khan progress partner 2,255 neiin cheng nuai 18.33 sen a ni a, phase 2 ah progress partner 3,113 thlang tawhin cheng vbc. 4.25 senna tur a ni a, sum hi la pek chhuah vek loh deuh a ni. Dilna la endik fel loh hi 2,135 a awm mek. Phase 3 kalpui mai tawh tur a nih avangin heng la endik loh (pending) te hi a ranglama umzui ni se an ti a, sum la pek kim lohte pawh a rang lama pek ni se, an ti.

Loan component bikah hian a vaiin progress partner 742 thlan tawh an ni a, an zingah hian loan hmu tawh hi 482 an awm a, an loan hmuh zat belhkhawm hi cheng vbc. 44.05 a tling tawh. MRB chuan pe hnem berin partner 314 an pe tawh a, an an loan pek zat belhkhawm chu cheng vbc. 23.98 ni. A pe tam ber dawttu chu SBI niin mi 104 an pe a, an pek zat belhkhawm chu cheng vbc. 9.48 niin, a pathumna chu Apex Bank an ni a, mi 59 an pe a, an pek zat belhkhawm chu cheng vbc. 10.20 a ni.

An loan punna rulhsakna (interest subvention) hi progress partner 479 te tan tum hnih kalpui a ni tawh. A tum khatnaah Rs. 15,92,137 pek a ni a, a tum hnihnaah Rs. 96,21,210 pek a ni. Guarantee fee pawh Rs. 14,01,762 pek chhuah a ni tawh. Loan huangah hian dilna lut tawh la endik fel loh hi 233 a awm mek.

Handholding Scheme leh NABARD thawk dunin (convergence) Serchhip district-a khaw pasarihah progress partners 500 te huam tur cheng nuai 625.45 project kalpui mek a ni bawk.

Handholding phase 3 kalpui leh turah kalphung thenkhat han siam rem ngai nia lang te an sawiho. Phase 3 ah hian inkaihhruaina han tihdanglam deuh a rawn awm dawn a ni. Zau zawka Bana Kaih media & publicity kalpui dan tur leh Postal Department atanga rawtna lutte an sawiho bawk.

Meeting-ah hian minister-te C. Lalsawivunga, Lalthansanga, PC Vanlalruata, F. Rodingliana leh Lalnghinglova Hmarte leh Dr. KC Lalmalsawmzauva, Adviser to CM (Handholding) bakah member dangte, sorkar thawhpui bank-te an tel a ni.