News

Transport Director R Lalrammawia chuan Road Safety Week hman chhungin special drive an neih dawn thu leh Mizoramah lirthei neitu chhiah pe lo an tam thu a sawi.

LBS Kia electric vehicles hmasa ber ‘The Caren Clavis’, Baptist Centre, Falklanda a tlangzarhnaah Transport Director chuan, “Road Safety Month hman mek a ni a, hemi hun chhung hian police-te nen tangkawpin special drive Mizoram pumah kan nei dawn. HSRP vuah lo, bike ri ring lutuk, city bus khu lutuk leh a dangte kan ngai pawimawh dawn. Kan tum ber chu in man hrim hrim a ni loa, dan inzirtir a, dan kan zawm tlan kan duh,” a ti.

R Lalrammawia chuan lirthei neihin a ken tel chu chhiah pek a nih thu sawiin, “December, 2025-a kan endiknaah Mizorama lirthei nei chhiah pe lo 40% an awm. Ring lo miten min rawn audit a, hetiang zat chhiah pe lo an awm hi mak an ti. Ringtu chuan chhiah pek turte a pe tur a ni,” tiin lirthei neitute chu chhiah pe thin turin a chah.