Mizotaxi mobile app peihfel

Vawiin (29.5.2026) hian State Transport Authority (STA) Mizoram chuan thuchhuah siamin, Mizoram chhunga passenger phur chi lirtheia chuang thin te’n sorkar approved rate diktak an chawi theihna atana duan Mizotaxi mobile app chu peih fel a ni ta tih an tarlang.

STA chuan, “Sorkar duhdan angin Aizawl khawpui chhungah bul tan phawt tur a ni ang a, a tahtawlin district dangah pawh kalpui chhoh zel tum a ni. Aizawl khawpui chhungah hian ‘Mizotaxi’ app hi July 1, 2026 aṭanga hman tan tur a ni. Chuvangin, Aizawl khawpui chhunga service lai 4-wheeler taxi te, 2-wheeler taxi leh autorickshaw zawng zawngte chu June 2026 chhungin Mizotaxi Office, DTO(L.A) Office hnuai, Transport Complex, Chaltlangah registration tifel vek tura ngen leh hriattir an ni e,” an ti.

June 2026 chhunga in register-te tan registration fee hi kum khatah Rs 600 (Rs.50/month) a nih tur thu tarlangin STA chuan, “Hemi hnulama in register te chu Rs 1000/- an pek a ngai tawh ang,” tiin Mizotaxi application hi playstore/appstore ah download theih turin dahfel a ni tawh tih an tarlang.