News

Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners Association (ADAROA) hruaitute nizan (19.6.2026) a joint meeting chuan Mizotaxi Mobile Application chungchangah an rawtna thlenten awmzia a neih loh chuan a tawp thlenga hmalak an rel.

Meeting-ah hian pawl pathumte chuan amahni pawl theuh executive committee na report leh thuchhuakte an report a, pawl pathum committee report-ah hian, Mizotaxi Mobile Application chungchangah hruaitute hmalakna a tawp thleng a thlawp an tum thu an sawi hlawm.

Mizotaxi online booking system that tawk lohna lai nia an hriat sawrkara an thlen te, a hlawhtlinna hmuh tur a la awm lo chu hriatthiam har an ti. Tunlai ei leh bar, khawsak na sang zel leh oil man to chho zel nen, STA-in March, 2024 a rate a siam sak hman tir an la tum chu hman chiah an ngai lo.

Taxi/auto hmangtu leh taxi/auto khalhtute tan pawh a chhiat tawn lohna tura an ngaih, rate awm tawk sawrkarah ziak a an thehluh tawh chu sawrkarin pawm sak thei se an duh a ni.

Tin registration fee Rs 500/- an chawi ngai tur leh mipui, taxi/auto hmangtuten taxi/auto an hman apianga chhiah(tax) 6%- 10% an chawi zel a ngai tur tha an ti lo. Driver/ rider zawng zawngte sawrkarin chhiah (tax) taxi/auto fare a tang a lak turah collector-a a hmang tur hi an duh lo a ni.

Pawl pathumte chuan, “Taxi/auto fare kaltlanga mipuia chhiah a lak tur hi eng dan hmang a lak nge a ni tih kan hre thiam lo a ni. Sawrkara kan rawtna thlenten awmzia a nei lo zel a nih chuan, pawl pathumte hian a tawp thleng a hma lak ni se kan ti,” an ti.