News

Mizoram Journalist Association (MJA) chuan thuchhuah siamin, vawiin (26.1.2026) a Republic Day lawmna Aizawla neiha thil thleng chu thleng tawh lo se an duhthu an tarlang.

India ram ni pawimawh Republic Day leh Independence Day-ah sorkar thuneitute’n press mite pawimawhna hriain, duhsak takin kum tam tak chhung chu press mite tan thutna bik ‘Press Enclosure/Gallery’ a siamsak thin tih tarlangin MJA chuan, “Kan lawm em em a ni. Hetih lai hian, kumin 2026-ah erawh chuan Lammual, Aizawla Republic Day lawmnaah ‘Press Enclosure/Gallery’ siam a ni lo tih Aizawl DC Office-a officer-te hnen a\angin hriat a ni a, a hmunah finfiah a ni,” an ti.

MJA chuan Republic Day ngai pawimawha press mi kalte’n thutna remchang tha an nei ta lo tih tarlangin, “Republic Day lawm dan tur rêlnaah MJA aiawh kan tel a, kan duh dan leh kum hmasa lama harsatna kan lo tawhte chiang taka sawi chhuah a ni chunga Press Enclosure/Gallery siam a ni lo hi a pawi kan ti hle. Hetiang hi thil awm dan a nih avangin Republic Day lawmnaa tel tuma Lammuala kal press mite chu kan haw leh ta,” tiin hetianga kal a ngai ta hi a pawi an ti tak zet thu an tarlang.

Kumin 2026-a Republic Day lawmna leh Governor’s At Home-a tel tura sawmna inpek danah pawh thil fel lo, thil nih dan phung ni lo a awm nual tih tarlangin MJA chuan, “Hei pawh hi a zia lo kan ti hle. Heng harsatna hrang hrangte hi tun hnuah chuan thleng tawh lo se MJA chuan kan duh tak zet a; national day – Republic Day leh Independence lawmna rêng rêngah Press Enclosure/Gallery siam zel turin sorkara mawhphurtute kan ngen a ni,” an ti.