MLA-in hlawhtlinna changte lawmpui

Aizawl East II Bialtu MLA B.Lalchhanzova, MoS chuan vawin (March 17, 2026) chhun dar 1 khan a pisa ah a bial chhunga thalai tun hnaia hlawhtlinna changte chawimawina leh lawmpuina hun a buatsaih.

B Lalchhanzova chuan thu sawiin, “Thalaite chu kan ram leh hnam hmabakte an ni a, kan ramin hma a sawn dawn chuan thalaite an fel a ngai,” tiin thalaite pangchang lo tura chahin, rilru huaisen tak pu se a duh thu a sawi.
Hlawhtlinna an chan atanga mite tanpuina rilru pu tur leh theihtawp a midang tana malsawmna ni tura luangchhuak tur chahin B Lalchhanzova chuan, “Midangte tana luang chhuakte nunah hian malsawmna a tam thin,” a ti.

Lawmpuina hi Chawngthu Lalrinhlua (MCS), Lalremsiami (MIS), Jonathan Zomuanpuia 7th UMAI National Muaythai Championship, 2026 ah gold medalist -Mercy Lalramhmachhuani leh Zothansangi, Under 23 One Day Plate Group Champion team a tel Hmangaihsangi leh Mizoram Cricket Academy coach H Malsawmdawngfamkimate an ni.

He hunah hian MLA chuan a bial chhunga thalai hna zawng mek te Staff Selection Commission (SSC) exam inbuatsaihna kawnga an inbuatsaihna puitu atan Chase Academy, Vaivakawn nen thuthlung an ziak.