News

PWD Minister puitu T Lalhlimpuia, MLA chuan vawiin (26.6.2026) hian Salt Lake, Kolkata-a Mizoram House building siamthat tura hma lak mek a hmunah a enfiah.

Mizoram House endik naaah hian building pawn lam leh chhung lama khi leh siam that ngai te, a chung lam atanga ruahtui far thin te, a building pawn lam bang thlawk chhuak (fins) a khi nasa tak, a hmar lam leh chhim lama bang, van hawi zawnga khi chat nasa tak awm te, floor tina a chhelai siam that ngai zualte enfiah a ni.

Tin, a kawt zawl lei hnuai tui luan kawr drainage chhia avanga kawt lei tlahniam te, electric wiring hlui tawh siam that ngai te, transformer hlui leh load zo tha tawh lo avanga chhe thin te, house ram hungna fencing hlui tawh siam that ngai te, a building chhung lam, a bikin bathroom leh commode siam that ngai hrang hrang te, tukverh frame hlui tawh thlak ngaite leh floor tina siamthat ngai lai chhe zualte pawh MLA hian a enfiah.

T. Lalhlimpuia chuan GAD changtu Chief Minister leh PWD Minister hmalaknain building chhe zual lai siamthatna tur fund cheng vaibelchhe 3 chuang hret ruahman mek a nih thu sawiin, “Repairing hna hi hun rei lo teah thawh tan a ni ang. He fund hian a chhe lai zawng zawng siam thatna a daih dawn loh avangin PWD engineer-te nen uluk leh zuala enho a, hmalak dan tur sawiho a tul,” a ti.

Fund awm dan a zira a tah tawla hna thawh a tul tur thu leh, a chhe zual lai leh hna thawh hmasak zual ngai lai tea bul tan phawt a, hma bak dangte siamna tur fund pawh a rang lama hotute berawn chunga ngaihtuah a ngaih tur thu pawh T Lalhlimpuia hian a sawi a ni.