MLA-in X-ray khawl a hlan

Ni (12.9.2026) khan Aizawl South-III Bialtu MLA Baryl Vanneihsangi chuan a bial chhunga primary health center (PHC) pahnih Sialsuk PHC leh Aibawk PHC ah X-ray khawl a hlan.

Sialsuk PHC ah X-Ray khawl hlanna hun hi chawhma dar 10-ah hman a ni a, Aibawk PHC ah chawhnu dar 12:30 ah hman a ni. Hun hmannaah hian PHC staff, Village Council, Hmuifangtlang Group YMA leh party aiawhte an tel a ni. Chhimphei tlang dung in an mamawh leh an awh em em, neih dan tur ngaihtuaha kawng hrang hrang a hma an lak ṭhin chu Bialtu MLA-in MLA Local Area Development Fund hmanga a tihhlawhtlin sak ta chu lawmawm an tih thu an sawi.

Bialtu MLA Baryl Vanneihsangi chuan Chhimphei tlangdunga emergency a X-ray ngaite damdawi in awmna khaw dang panpui ngaia an awm ṭhin chu damlo tan leh a buaipuitu tan a buaithlak hle tih sawiin, “Sialsuk leh Aibawk PHC-ah X-ray technician an awm laiin X-ray khawl hlui tak, fiah lo taka lak theihna awm chu digital X-ray khawl ṭha takin an thlak a, bial mipui leh bial pawn mamawh tute tan ṭangkai taka an hman ngei ka beisei,” a ti.

Aibawk PHC a hun hman zawh hian X-ray room leh dark room siamṭhat ngaite en ho a ni a, PHC tihchangtlun dan tur sawi hoin PHC tual PCC ngaite pawh en ho a ni a, Bialtu MLA hmalak puinaa nurse indaih lo tihziaawm nan an dil belh chu an hlawhtlin avangin lawmthu an sawi bawk a ni.