News

September 7, 2026 khan Gauhati High Court (Aizawl Bench) chuan Mizoram Liquor (Prohibition) Act, 2019 zawm lote chunga dan ken kawh theihna NGO-te’n an neih loh thu an tarlang a, dan kengkawh tura thuneitute chu dan kenkawhna kawngah an pui thei thung.

GHC, Aizawl Bench chuan NGO-te hian anmahni kuta dan kenkawh theihna erawh an neih loh thu thubuai lut a awm avangin a tarlang a ni. He thubuai ngaihtuahtu Justice Nelson Sailo chuan NGO-te’n dan zawm lote in kalhsak theihna an neih loh thu a sawi.

Court chuan zu khapna dan hi an bawhchhia a nih chuan dan kenkawh kawnga thuneitute’n dan angin hma an la tur a ni a, tualchhung NGO-te pawhin tha taka dan kenkawh a nih theih nan thuneitute chu an pui thei a; nimahsela, anmahni thu a dan kengkawh a, an in lo kalhsak te phal a ni lo tiin a sawi.

Tin, District Law Enforcement Agency chu hetiang thil a thlen tawh loh nan hma la turin a ti.

He thubuai thehluttute hi nupa niin Chhingchhip, Serchhip District-a cheng an ni. NGO Joint Committee chuan zu zuar an awm a, vawi thum zu an zuar tih man chhuah an nih chuan an in kalhsak an ni ang tiin an rel. Thubuai thehluttute hi vawi li(4) lai zu an zuar tih man chhuah an nih tawh thu thlen a ni a, hemi hnu hian an in kalhsak an nih mai piah lamah, tan inah khung an ni ta a ni.

Sorkar tana ding Government Advocate Lalnunhlui chuan May 19, 2026-a Serchhip SP office-a meeting neih a nih hnuah, SP chuan NGO-te chu an in hawnsak leh turin a hriattir. Hemi hnu hian thubuai thehluttute in hi NGO-te hian an hawnsak leh tawh a ni.

Tha takin an in pawh an luah lut leh tawh tih High Court a hriattir a, an thubuai thehluh chhan ber, an in kalhsak chungchangah thuneitute’n hma an laksak tawh avangin leh an in hawnsak leh tawh an nih avangin he thubuai pawh hi tihtawp zui a ni.

Source : www.jclalnunsanga.in