News

MNF Legal Board chuan vawiin (April 15, 2026) hian Aizawl District Election Officer hnenah MCC bawhchhiat a nih chungchangah complaint an thehlut. He complaint hi MNF Legal Board Joint Secretary Lalbiakkima, Advocate hmingin thehluh a ni.

MNF legal Board chuan MCC bawhchhiatna a complaint an thehluhah hian, “MCC No. II leh VIII hnuaiah khuahkhirhna dan awm chu chiang takin palzut a ni. He complaint hian a tum chu Aizawl hmasawnna atana hmalakna daltu ni loin dan hnuaiah, dan ang takin hmasawnna hi kal se kan duh. Inthlan denchhen a dik lo taka hmalak hi do a ngai a ni tih rilru pu a Complaint hi thehluh a ni,” an ti.

“State Election Commission-in fair taka ruling leh opposition party ten inthlanna felfai leh thianghlim kan neih theih nan inkaihruaina dan a siam chung pawha, sorkar laiin sorkarna hmanruaa hmanga an party candidate-ten vote an hmuh theihna tura sorkar hmalakna Model Code of Conduct-in min phuar rih pawh pawisa loa, campaign-na atana an hmang fo hi MCC dan kalh a nihna ang leh level-playing field inang party tin ten kan neih theih nan he complaint hi kan thehlut a ni,” tiin MNF Legal Board chuan an ti bawk.

Complaint an thehluhte :

1.Aizawl East- II ZPM Block Media Cell thuchhuahah chuan ni 06.04.2026 khan Minister B Lalchhanzova chuan Armed Veng South Cultural Club-te senso a tumsak thu an tarlang a ni.

2.Aizawl East-II huamchhungah tho Chhinga Veng Junction chu ni 11.04.2026 ah siam a ni.

3.Ni 26.03.2026 ah K Lalrodinga Ward No XVIII ZPM Candidate chuan Venghnuai Branch MUP te chu pawisa pein, Sorazo a sem bawk.

4.Minister C Lalsawivunga chuan 11.04.2026 Republic Vengthlang ah transformer dah a tiam thu a sawi.

5.MP Richard Vanlalhmangaiha chuan 11.04.2026 khan Republic Vengthlang leh Upper Republic chu Mahindra Bolero pick up a pe.