News

Vawiin (29.1.2026) chhun Thakthing Zawlbukah Aizawl South II Block Mahila Congress Committee chuan intawhkhawmna hun an hmang a, MPCC President Lal Thanzara’n a hmanpui.

MPCC President chuan mi thenkhatin Congress Party chu pathumna hmuhin an hmuh mek thu sawiin, “LADC-a MDC pakhat kan neihnaah MDC 7 kan nei chho dawrh a, AMC ah hian corporator 2 chauh kan nei mek a, hei aia tam hi kan neih kan beisei viau tawh. Hnungtawlh loin hma kan sawn tih hi ka sawi duh a ni. Ram puma Congress lo ni tawh thinte hi kai tho ang u, keini lo chu ram tana hnathawk tak tak an awm lo. Kan ram hi beisei a la awm lai leh beisei bo a nih hma hian keini bawk hian hma kan lak chuan kan ram hi kan la chhanchhuak thei a ni,” a ti.

Congress an sorkar lai khan hriat thamin corruption-a mualpho an nei lo tih sawiin Lal Thanzara chuan, “A lawmawm hle, MNF an rawn sorkar a, anni hnuaiah hmasawnna a thlen kan hre lo. Pu Zoramthanga’n corruption case a rawn nei a, court-a thiam a chan chhan pawh kan la hria ang, a unaupa pawisa a kawl vang tih a ni a, khang sumte kha thianghlim taka an thawhchhuah ring an awm lo,” tiin MNF sorkar laiin Lengpui Airport chei ṭhatna tur sum central atangin a rawn kal a, vai contractor nen an bitum chat thu a sawi.

MPCC President chuan ZPM Sorkar chungchang sawiin, “Min hruai danah hian an tih loh tura an sawi apiang an ti a, sorkar hmasa an demna zawng zawng an rawn ti chat chat. Lengpui Airport ram hrul hralh chungchangah pawh Indian Air Force nen an indawr tih kan hria a, ram an hralhnaah hian thil fel lo a awm ngei tih a chiang a ni. Sorkar hmasate anga kan kal mai mai a nih chuan keini pawh hi kan sorkar a ngai kher lo ang, kan insiam tha mek a, hma lam pan zel turin kan inbuatsaih nasa hle tawh. Keini hian ram leh hnam hi kan siam that a ngai takzet a ni,” a ti.