News

Lengpui Land Scam-ah Mizoram Sorkar hotute an inhnamhnawih ngei nia an hriat vangin MNF Party chuan CBI chhuitir tura ngenna Chief Vigilance Officer, Khilli Ram Meena, Chief Secretary ni bawk hnenah vawiin (5.2.2026) hian an thehlut.

MNF aiawh hian MNF Legal Board Vice Chairman Lalpianfela Chawngthu, MNF General Secretary ni bawk chuan, “Indian Air Force-te hnena Lengpui ram hralh kawnga Dan bawhchhiatna nasa tak thleng leh cheng vaibelchhe 188 vel zet tih chingpenna thleng chu Mizoram Sorkar thunun theih loh CBI-te chhuitir ngei a tul a ni. Mizoram Sorkarin December 28, 2023-ah Mizoram pumpui chu CBI te thuneihna huam chhung (Powers and Jurisdiction area) ah puang zuai mah se, a hnu lawk June 27, 2024 ah sut lehin, Central Sorkar hnuaia thawkte chauh chhui phalsak an ni. Mizoram Sorkar hnuaia thawkte chhui thei tur chuan Mizoram sorkar phalna lak hmasak zel ngaia dahlet leh a nih avangin, CBI te chhuitir tura hma la nghal theitu chu Mizoram Sorkar a ni a, Mizoram Sorkar inkaihhruaina dinglaiah Vigilance Dept. chu CBI hnena thubuai pe theitu a nih avangin CBI chhuitir tura ngenna hi Chief Vigilance Officer hnenah thehluh a ni,” a ti.

Lalpianfela Chawngthu chuan ZPM Media Committee Chairman hminga CBI a FIR thehluh tumna awm nia sawi chu tlanchhe chunga mipui bum tumna nia sawiin, ” Sorkar kalphung pangngai awm sa (proper channel) hmang ngam lova, ruling party Media Committee Chairman hminga FIR thehluh chu thil kalphung a ni lo a, CBI chhuitir tumna aiin politics thil taka hmai phihfai tumna mai a ni tih mi a nileng lo tan chuan a lang chiang nghal vek. ZPM Sorkar hian kan lehkha thehluh hi bawhzuiin, sorkar kalphung pangngai (proper channel) ngeia CBI te kuta a hlan kan beisei a, kan umzui zel dawn a ni,” tiin Chief Vigilance Officer hnena CBI chhuitir tura ngenna a thehluhah hian dan bawhchhiatna thleng chi hrang hrangte a tarlang a ni.

Lalpianfela Chawngthu hi MNF Legal Board Hruaitute leh MNF Publicity Board hruaitu bakah MNF hruaitu dangten an tawiawm a ni.