News

Vawiin (16.12.2025) chhun khan MNF chuan an office-ah kum tina an hman ṭhin, Exodus Day ṭum 54-na an hmang a, he huna thusawitu MNF Sr. Vice President Dr R Lalthangliana, MLA chuan, “MNF dinchhan chu Mizo hnam leh Mizoram dinchhuah tir leh Kristian sakhua humhalh tlat a ni. He MNF dinchhan hi a la ngai reng a, a dinchhan tihlawhtling tur hian MNF chu nghet takin a ding zel a ni. Pathian leh kan ram tan MNF a kal zel dawn a ni,” a ti.

Dr Thangtea chuan MNF hian din a nih tirh aṭangin harsatna hrang hrang a tawk tam hle tih sawiin, “Mizo hnamin zalenna famkim a neih theihna tura a beihna kawngah te, sorkarna fung a chelhna kawngah te pawh harsatna a tawk nasa hle a ni. Mah se, Pathian leh kan ram tan, ti tlattu kan nih angin Pathianin min hruai zel a, hma kan sawn zel a ni. ZPM Sorkar vung vanglaiin Sinlung Council inthlanah kan sorkar a, Phunchawng LC thlanah seat 5-ah seat 4 kan la a, Dampa Bial by election-ah hnehna kan chang a, LADC inthlanah seat kan la tam ber bawk a ni,” tiin Lalpa an rin ngam tak zet a nih chuan Pathianin MNF-te hi rorelna a pek leh tur thu sawi.

MNF Sr. Vice President chuan Lalpa mit MNF chungah a fu reng dawn tih sawiin, “A malsawmna dawng tlak kan nun a pawimawh a ni. He hun a lo thlen hian zalenna sualtute kan hrereng a, Pathian leh Mizo hnam tana an nunna hlu tak hlantu Martar-te zahna chibai ka buk bawk a ni,” a ti.

MNF thuchhuah tarlan danin, Zoramin zalenna a sual laiin East Pakistan-ah hnam sipaite leh nunau tam tak hmelmain an hualbet a ni. Mak tak maiin an ṭawngṭaina Pathianin a chhang a, huanbehna aṭang chuan Lawng hmangin Pathianin hnam sipaite chu Arakan lama a hruai lut. Thih pukna atan chhanchhuahin an awm a, Mizo Hnam Movement a kal zawm theih phah a ni. Hemi hriatreng nan hian MNF chuan kum tin Exodus Day hi December 6 hian a hmang ṭhin a ni.