MNF-in kan sum dinhmun nasa takin an tichhia &#8211; Dr Lalmalsawma

MPCC chuan vawiin (27.2.2026) hian an office-ah chhung inkhawm an hmang a, thusawitu MPCC Treasurer Dr Lalmalsawma Nghaka chuan MNF-in kan sum lai pai dinhmun nasa takin an tichhia nia sawiin, ZPM chu sum puka champion-ah a puh.

Dr Lalmalsawma chuan “ZPM sorkar hian 2023 inthlan dawn khan, ‘puktu ni lovin, puk tirtu kan ni ang,’ tiin an sawi. Kumina kan budget hi vbc. 17,469.92 a nih laiin kan leiba hi vbc. 19,085.15 a ni mek a, kan leiba hi kan budget aiin a sang ta der mai. Kum 2 chhungin vbc. 6,375.86 in a pung hman a, an term tawpah phei chuan vbc. 25,000 chuang a ni hman dawn niin a lang” a ti.

MNF sorkar khan leiba a ngah thu hahipin an sawi thu sawiin MPCC Treasurer chuan, “Mak kan ti a, vawiina kan sorkar hrawn mek hi sum leh pai enkawl thiamah inngai mah se, an thiam loh zia a lang a, chhiarkawp thiam pangngai chuan a punna hi kan hrethiam vek. Congress khan leiba a pun loh nan theihtawp kan chhuah a, kan sorkar loh hun kum 7 chhung hian leiba lamah hma kan sawn a, ZPM sorkar hi leiba tih pun lamah an rawn champion chho mek,” tiin ZPM sorkar chuan MNF sorkar a rawn pelh tak thu a sawi.

Dr Lalmalsawma chuan MNF khan kan sum leh pai dinhmun nasa takin an tichhia nia sawiin, “Chung zawng zawng nuai bo intiam ZPM-te hian eng nge an tih? PWD ringawta restricted tender Amount kum 2 chhung belhkhawm chu ₹10,67,98,54,293 a ni tawh. Heng hna aṭangte hian GST 18% leh labour cess 1% la ta nise, sorkar sum hum tur chu ₹202,91,72,315.6 a ni. Pu Zoramthangate sorkar pawh khan em em an tih a rinawm hle. ‘ka ti ve lo ang’ tite hian quarters sak thlenga restricted tender an ti thil dik lo chu a ni. Kan CM-in corruption awm lo anga a sawi kha a vanduai thlak hle. Hei lo liama corruption hi a awm thei lo. Heng thilahte hian mantang ei an awm em ni? Contractor ten an va sawi sep sep si ve. Zoram mipuite hian thil kalhmang kan enfiah a ngai tawh hle,” a ti.