MNF-in Mizoram Independence Puan kum 60-na an lawm

MNF chuan vawiin (2.3.2026) hian Vanapa Hall-ah Mizoram Independence Puan kum 60-na (Diamond Jubilee) an lawm a, thusawitu MNF President Zoramthanga chuan ZPM Sorkara hotupa ber chuan a tuka lang leh mai tur dawt a sawi zuah zuah thu sawiin, MNF-in independent an sual chhan a sawifiah.

Zoramthanga chuan Mizoram Independence Puan kum 60-na tling thei tura MNF nunna zuah zel a la ni leh MNF Founder President Laldenga nupui Biakdiki pawh thu sawi theia a la awm avangin Pathian hnenah lawmthu a sawi, “MNF chu kum 1961 din niin tunah kum 65 hmel a hmu tawh. Hengte hi movement dangin an tih ve theih loh, Pathian remfel ang thlapa kal a ni. India Independence lai khan E.Pakistan-a a awm te, Burma rama awm duh te, India-ah emaw British hnuaia la awm zui duhte leh independence duhte kan ni nawk hlawm. August ni 15, 1947 khan Mizoram chu India ramah kan awm ta tih hre lo tam tak a hun lai khan an awm a, British lah an liam daih a, agreement sign leh ban phartirna pawh awm loin India-ah khan kan awm ta ringawt a ni. Hei tak hi Pu Denga te khan India Prime Minister hnenah India chu Republic a nih a, constitution an siam lai khan, India siamnaah kan tel ve lo a, barhluih kan ni an ti. India ramah kan tel ve dawn a nih pawhin Mizoram tana tha leh him tur kan duhzawng kan sawi ve ang chu, chuti ni loa constitution in barhluih ringawt chu thil fel lo tak a ni, an tih chu khatih laia Prime Minister Lal Bahadur Shastri pawh khan hnial ngaihna a hre lo, ‘mithiamte ka lo rawn phawt ang e’ a lo ti e,” a ti.

Hun a kal zel a, February 11, 1966-ah Assam Chief Minister Chaliha chu Laldenga’n biain, ‘sipai kan tir lo ang in ti si a, enga ti nge in rawn tirh leh si?’ tia a zawh chuan ‘ka rawntir lut lo thei lo’ tiin a lo chhang tih sawiin MNF President chuan, “Pu Denga’n buai ai chuan Chaliha chu biak a tum leh a, Chaliha chuan a lo be duh ta lo. Keini pawhin kan tih tur ngaihtuahin March 1, 1966 khan Mizoram ondependence kan puang ta a, kan inkap tan ta a ni. Kum 20 chhung kan inkah hnuin kohhran, NGO leh pawl hrang hrang ngenna angin inremna entawntlak ber kan nei ta. Electoral roll-a la awm lo thlan tlin hlim Chief Minister nihna Pu Denga’n a lan theite kha a inremna ropuizia tilangtu a ni,” tiin India leh MNF inremna kha thenkhatin sawi bawrhban tum thin mahse, a hlutzia kan hriat zel thu a sawi.

MNF President chuan Lalduhoma’n pawl hrang hrang dina kum 40 chuang zet a kalpui hnuah ZPM chu kum 2023 inthlanah khan an thlipui a tleh a, MLA 20 chuang zet neiin an sorkar ta tih sawiin, “Mahse, mipuiin an hre chiang tulh tulh a, an mo thar laiin rulling lai an tlin ngei ngeina thin inthlan hrang hrangah an tla zel. Sinlung Hills Council-ah te, Dampa bye-election ah te, LADC-ahte pawh an tla zel a ni. Nasa takin electric bill an tisang a, eng sorkar mahin a la tih ve ngai loh petrol leh diesel man an tisang a, revenue tax hrang hrang a letin an tipung a, ration buhfai man a letin an tisang bawk. Sawhthing leh hmunphiah chingtute an mangang em em a, sorkar hnathawkte pawh a ni telin ZPM Sorkarah an beidawng nasa hle. A tuka lang leh mai tur an hotupa berin dawt a sawi zuah zuah a, a hoten an chulmamsak zel a, a hote chulmam sen loh hutupa berin dawt a sawi thin a ni. Kawng lakah Pathianin MNF hi a kalsan dawn lo a, a hun a tihah Pathianin a chawisang leh zel thin a ni,” a ti.