May 13, 2026
Wednesday
MNF chuan thuchhuah siamin, vawiin (13.5.2026) a Manipur-a Zo hnahthlak pastor pathum kahhlum an ni chu pawi an tih takzet thu an tarlang a, “Thinlung takin he thihna lo thlenga thite hi kan a sun a, pawikhawihtuten an phu ang ngei hremna hmu se kan duh,” an ti.
MNF tarlan danin, Churachanpur aṭanga Kangpokpi pana Thadou Baptist Association hruaitu, motor pahniha chuangte chu Kangpokpi district an thlen hnu, Kotzim leh Kotlen khaw inkarah kahhlum an ni. Pastor pathum thite hi Rev Dr Vumthang Sitlhou, Rev Kaigoulun Lhouvum leh Rev Paogoulen Sitlhou te an ni a, mi paliin hliam an tuar.
Manipur-ah boruak ṭha a awm chhoh mek laia hetiang thil duhawm lo tak mai a thleng hi pawi an ti tih tarlangin, “Hliam tuarte pawh ṭha chhuak leh ngei turin duhsakna kan hlan. Hetianga Pathian mi, sakhaw puithiamte chungah kutthlak a ni hi kan hrethiam lo hle. A pawi kan ti tak zet a ni. Manipur-ah Zohnahthlakte inkarah leh hnam hrang hrang inkarah remna tluantling awm se, tih hi kan duh dan a ni,” an ti.
