News

MNF Legal Board chuan vawiin (31.3.2026) hian Aizawl Press Club-ah press conference neiin, Inthlan apianga hmeichhe candidate-ten mawi lo tak taka social media-a beih an tawk thin pawi an tih thu sawiin, ” Hmeichhiate hmusitnaah kan ngai,” an ti.

MNF Legal Board Treasurer Zothansangi Hmar chuan AMC inthlan lo awm turah danin a sawi anga hmeichhe seat eng emaw zat bakah general seat thlengin hmeichhe candidate an awm nual tih sawiin, “Hei hi Mizo hmeichhiate hmasawnna nasa takah MNF chuan kan ngai a, heng hmeichhe candidate-te hi kan chhuangin kan duhsak takzet a ni. Hetiang hi a nih laiin kan hmeichhe candidate-te social media kal tlanga mawi lo tak taka beihna a lo chhuak thin hi a pawi kan ti. Hmeichhiate dinhmun rahbehnaah kan ngai bawk a ni. A bikin tun hnaiah MNF ten AMC inthlanna lo awm tura Ward- IV-a kan candidate Nl. R. Lalnunthari (Nunui Rualheng) chuan mawi lo tak tak, hmeichhiat mipatna rawngkai leh hmeichhiate zahawmna tibawrhbang thei zawnga beihna a tawk nasa hle. Hemi chungchang hi kan ngai thutak hle. Hetiang hi a thleng leh a nih chuan a tul ang zelin MNF Legal Board chuan hma kan la ang,” tiin an candidte hmeichhiate hi engtiklai pawhin an thlavang hauh tura an inpeih reng thu a sawi.

Political Party tinte leh candidate zawng zawng ten an zawm tur Model Code of Conduct 2026 chu State Election Commission Mizoram in an rawn chhawpchhuak tih sawiin Zothansangi Hmar chuan, “Tin, hetianga mimal nun phawrh sak zawnga campaign hi Model Code of Conduct 2026 Bung II (c)-na hian a khap tlat a ni. Model Code of Conduct-ah chuan heti hian a inziak: –
II (c) Khingpuite leh party hruaitute mi mal nun, mipui rawngbawlna lam nena inkaihhnawih ni si lo, insawi chhiatna.

Hetianga State Election Commission-in inkaihhruaina tha tak a siam chung pawhin mi thenkhatte chuan kan duhthawh luatah tun hnai lawkah social media lamah an khingpuite mimal nun leh an nihna dik lo takin, mipuite rilru hruaikawi tur zawngin, thlalak leh thu post an siam nasa hle a. Hei hi a pawi kan ti takzet. Kum 2026-ah hetiang thil a la thleng hi a zahthlak kan ti a ni,” a ti.

MNF Legal Board Treasurer chuan inthlan a nih avanga candidate hmeichhiate zahawmna leh mawina tibawrhbang zawnga thu leh thlalak thehdarh te chu India ram criminal law hnuaia pawikhawihna a nih thu sawiin, “Court thubuai neih theihna leh thiam loh chan phei chuan lung in tan emaw pawisa chawi theihna a ni. Kan ramin changkan lam kan pan mek emaw kan tih laia inthlan apianga a hnufual zawng leh hnungtawlh zawnga kan inbei thin hi chu India rama literacy rate sanna state tih atan hian a mawi lo takzet ni mai lovin tih loh tawp tur a ni,” tiin inthlannaa kan khingpuite kan beih dante hi tun aia changkang zawk, zahawm zawk, awmze nei zawk lo ni tawh se tih MNF Legal Board-te chuan an duhtusam a nih thu a sawi.