MNF Thalaiin an enfiah

Nimin (10.9.2026) khan MNF Thalaite chuan Operation Servant of God (SOG) hmalakna kal zelah an Vice President Lalnunmawia Pautu leh Mamit Bialtu MLA H Lalzirliana hoin MSSC REC Motorsports Race Track, Lengpuia siam mêk chu a hmunah kalin an enfiah.

H Lalzirliana chuan MNF Sawrkar khan thalaite tuihalna hriain kum 2022 khan Rural Electrification Corporation (REC) CSR Fund leh SASCI sum tangkawpin North East-a race track hmasa ber ni turin he project hi bul a lo tan tih sawiin, “Ram rohlu (assets) insiam siak kawngah sawrkar mêk leh sawrkar lo la awm zel turte hi kan intlansiak a pawimawh hle. Thalaite hmakhua hi Zoram enkawltute hian kan mutmawh hnarmawh tur a ni,” a ti.

MNYF Vice President Lalnunmawia Pautu chuan, MNF Sorkarin kum 2022-a engkim ruahmanna – sum sanction leh contractor thlan tifelin kum 2023 December-a MNF Sorkar a tawp khan 90% chuang hna zawh a ni tawh tih sawiin, “November 2024-a hawn ngei beisei a ni. Sum pawh awm vek tawh ni si vawiinah pawh hawn theih a la ni lo hi MNF Thalaite chuan a pawi kan ti hle,” tiin ZPM Sorkarin he race track a ngaihthah vang leh SASCI sum tam tak a tih lapse nghawng ni ngeiah an ngaihthu a sawi.

MNYF Vice President chuan, he race track design leh hnathawh dan hian mit a tlung hle a, ZPM-in sawrkarna an chan hnuah kawngpui atanga a panna (approach road) siam loha a awm ta reng hian nasa takin hnathawh a tithuanawp nia sawiin, “MNF kha sorkar zel se chuan a vaiin kum 2 liam ta kum 2024 daih tawhah khan hawn a ni ang. REC nena lo sawi lawk tawh angin Eastern India-a a hmasa ber ni turin 2025 March-ah he hmunah hian REC International Racing Competition 2025 neih a ni tawh ang,” a ti.

MNF Thalai tarlan danin, REC-MSSC Racing Track an tlawhnaa kan thil hmuhchhuah chu- ZPM Sorkarin he race track siam hna hi a chhunzawm chak loh avangin nasa taka a zawh hun tihkhawtlai a ni. Motorsports lama tuimite rilruna pawh MNF Thalaite chuan an hriatthiampui a, sorkar chetlak chhoh dan pawh an vil reng dawn.

CM Lalduhoma’n MNF Thalai President kalchhuak ta Robert Romawia Royte hnena a lo sawi tawh angin he racing track panna kawngpui hi a rang thei ang bera siam vat MNYF chuan an phut a ni.