MNF tlakchhiat dan a turu hle &#8211; Lal Thanzara

MPCC President Lal Thanzara chuan nimin (12.6.2026) leh vawiin hian MLA constituency pathum – Dampa, Hachhek leh Mamit a khaw hrang hrangte a tlawhkual a ni.

Lal Thanzara chuan MNF-te tlakchhiat dan a turu hle nia sawiin, ” Pu Zoramthanga a chawl anga tu nge thlak ang tia an inrinsiak laiin Pu Rama chuan ban a tum der lo, Aizawl East-I a din leh tumin hma a la mek. Amah tel lova kal zel tumtu MNF worker-te a tibeidawng em em a, MNF party an buairu hle. MNF hruaitu zingah BJP an thlawpna hnukdawk duh pawh an tam, BJP an thlawpna an hnuhdawh rual rualin engtin tin emaw an tihbuai chuan jail bang zut thei mai tur an awm tih hrefiah an awm bawk si. Him ziktluak lo tur an awm tih inhria an awm a ni,” a ti.

MPCC President chuan Rajya Sabha MP thlan a hun dawn a, dan pangngaiah chuan ruling chan niin party ten nomination te siamin hma an la thin tih sawiin, “Tun tumah hian ZPM hian inthurualin an rel lo nia sawi a ni. MP candidate puanniah pawh CM leh Home Minister pawh an awm lo nia sawi a ni. ZPM chhungkuaah Pu Sapa lam tang leh Pu Duha lam tang an awm hi thil chiang a ni. Thil chiang a nih mai bakah, pawl pahnih te hi kum 2028 inthlan thleng khian thurualin an kal ang em?” tiin a zawhna a siam.

MPCC President chuan MLA pakhat chauh nei Congress chu Pathianin rorel turin a siam thei tih sawiin, “Kan ramah hian Congress a sorkar leh a, mipui nawlpui ten leirem an rah leh theih nan NLUP changtlung zawk kalpui a nih leh theih nan theihtawp chhuah ang u,” a ti.