MNREGA thlak danglam tuar ber tur ZPM sorkar

MPCC Adviser Zodintluanga, Ex Mimister chuan ZPM chu sawhthing avanga sorkar an nih ang bawkin sawhthing avang bawkin an tla leh dawn tiin Hnahthiala All India Congress Committee-in India ram pum huapa MGNREGA thlak danglam duh loh lantirna programme vawiin (10.2.2026) a an buatsaihah a sawi.

Zodintluanga chuan sorkar laipuia Congress-in rorelna a chelh laia kut hnathawktu, thingtlang mite tana kum khat ani 100 inhlawhna an siam chu BJP sorkar chuan tihtawp tumin thiam takin a hming thlak ang leka lang siin hma a la zel nia sawiin, “NREGA kaltlanga ni 100 inhlawhna chanvo, sorkarin a tihsak ngei ngei tura India ram dan chu thlak danglam a ni a, chanvo ni tawh lovin inhlawhna sorkar laipuiin a siam lo a nih pawha sawisel theih tawh loh a ni. BJP-in dan thar an siam hi Hindu sakhuana nena inzawm tlata duan a ni a, he dan kan hman chuan thingtlang pa leh kohhran up ate pawhin vai pathian hming lamin Ji-Ram-Ji an tih zel a ngai tawh dawn. He dan tharah hian state sorkarin za zela 40, state-te deuh Mizoram te pawhin za zela 10 a doletna tur kan thawh a ngai dawn a, ZPM sorkar, a sorkar hnathawkte pawh sum puka hlawh pe thei tawk tawk tan chuan a doletna sum ngaihtuah hi thil harsa leh theihloh tluk a ni dawn. A tuartu tur ber chu ZPM sorkar a ni,” a ti.

MPCC Adviser chuan ZPM sorkar chu an sawi loh ang zela awmah puhin, “Kan ti ang an tih ti loa, kan ti lo ang an tih ti zel an ni. Sawhthing avanga sorkar an ni a, sawhthing avang bawkin an tla leh dawn. Kg&ah cheng 50 in kan lei dawn an ti a, an lei fumfe theih leh tak loh avangin tunah hian khawchhak tlangdunga sawhthing chingtute chuan vai hnenah kg. ah cheng 30 in an hralh mek, anmahni avanga sawhthing chingtu loneitute chuan sorkar thu hi an ring ngam tawh lo a ni. An insawi ang chuan a lei te chu an lei ve ngei a, mahse vawikhat an leinaah pawh khan corruption a tam em em a, nuai 100 tel a chingpen a, Agriculture Minister ngei pawhin thil dik lo tam tak a awm a ni tiin a puang tawp a, sawifel ngaihna pawh a hre lo,” tiin ZPM sorkarin sawhthing an lei dan chungchang felhlel taka awma a hriat thu a sawi.