MNYF-in CM zin haw tur an hmuak

Mizo National Youth Front (MNYF) chuan vawiin (8.8.2026) hian Delhi atanga lo haw tur Chief Minister Lalduhoma chu CM Bangla bulah pawndum leh thuziak hrang hrang nen an lo hmuak.

MNYF President Gogo Lalremtluanga chuan Lalduhoma chu a hun tawp lamah mipuiten duhsakin CM thutthleng an pek thu sawiin, “A thil tawn tawh atangin Mizo mipuite harsatna leh duhdan a hre tawh tura kan ngaih laiin, vawiinah kan thalai rualte rilru kaihruai sual thei tura dawt thu a sawi duh leh ILP chungchanga Mizo mipuite ti thlabar zawnga thu a sawi duh hi pawi kan ti. Mizoram CM awm tawh zawng zawngah CM dawihzep ber a ni,” a ti.

Enchhin sorkar duhsakna nen a kal chhoh thu sawiin MNYF President chuan, “Buhfai man an ti toa, oil man an tisang a, kalphung thar a lawm tiin mipuiten an la ngaidam. Kum hnih leh a chanve vel an sorkar a, Mizoram dung leh vangah kawng a chhe em em, restricted tender pe tam ber an ni. Zrtirtuten sorkar notification an hal a, thalaite MPSC tualah an pungkhawm,” tiin mipuite an beidawngin, thalaiten kal ngaihna an hriat tawh loh thu a sawi.

An thuziak ken thenkhatte chu ‘dawt sawi level sang CM atan kan duh lo’, ‘kohhran upa CM dawt sawi hmang kan duh lo’, ‘dawih zep taka ram hruai ai chuan bang mai la’, ‘CM kan neih tawh zinga dawihzep ber Lalduhoma’ tih leh ‘BJP tlawn nan ILP hralh kan remti lo’ tihte a ni.