News

Nimin (24.7.2026/ khan Mizoram Olympic Association (MOA) chuan MSSC Conference Hall, Republic Vengthlangah General Board Meeting neiin kum 2026 – 2030 chhung atana hruaitu tur an thlang nghal.

MOA General Body Meeting hi President Robert Romawia Royte in a kaihruai a, Secretary General V.Lalzawmliana kum 2022 – 2026 chhunga MOA hmalakna hrang hrangte leh hmachhawp thenkhatte a report. Joint Secretary Joseph Thansanga pawhin North East Games leh National Games-a Mizoram hlawhtlinnate leh rawtnate a tarlang.

Treasurer C. Vanlalmawia hnen atangin pawl sum chet dan report ngaihthlak a niin Senior Vice President F. Lalnienga’n lawmthu sawinain hun a khar.

Rorel inkhawmah hian MOA hmalakna hrang hrang leh sum hman dan chhawpchhuahte chu pawm a ni a, IOA leh National Sports Code 2026 in a duh anga tih danglam turin MOA Constitution pawh her rem tura pawm a ni bawk.

MOA rorel inkhawm zawh hian kum 2026-2030 chhung atana office bearer thar thlanna neih zui nghal a ni. Indian Olympic Association kalphungin a phut angin inthlanna hi Hon’ble Justice Marli Vankung, Former Judge, Gauhati High Court in a kaihruai a, sawrkar aiawhin Albert Lalnunpuia, Senior Sports Promotion Officer leh IOA aiawh Bamang Tago, General Secretary, Arunachal Pradesh Olympic Association ten thlanchhuahte hriatpuiin an nemnghehpui.

MOA hruaitu thlan tharte chu

President : Lalnghinglova Hmar (Football)

Sr.Vice President : C.Lalrinzuala (Table Tennis)

Vice President : Ronnie Rosanga Varte (Judo)

General Secretary : V.Lalzawmliana (Archery)

Joint Secretary : Rosangliana (Badminton)

Treasurer : Joseph Thansanga (Taekwondo)