MPCC-in Special Assembly Session koh phut

Mizoram Pradesh Congress Committee (MPCC) hruaitute chuan vawiin (28.7.2026) chhun khan Aizawl Press Club-ah press conference neiin, Foreign Contribution (Regulation) Amendment (FCRA) Bill, 2026 chungchang ngaihtuah tura Special Assembly Session koh an phut thu leh FCRA vanga ‘Black Day’ an hmannia an thil phutte an la phut reng thu an sawi.

MPCC hruaitute chuan July 21, 2026 khan Parlianment Moonsoon Session-a FCRA
Amendment Bill, Christian-te min tin zawnna ni ngeia lang, Central Sorkar-in pass a tum duh lohna lan tirin Black Day/Protest Day an hmang tih sawiin, “Kha khan Mizo mipuite leh kohhrante min kai harh ta deuh nia kan hriat avangin kan lawm hle. Chutihrualin, kan sorkar pawh a thangharh ve ta deuh nge, kan CM zahawm takin kohhran hruaitute a sawipui ni awmin chanchin kan lo hria a, a lawmawm hle,” an ti.

Hetihlai hian, MPCC hruaitute chuan Black Day an hman \um a, Mizoram Sorkar hmalakna tura an thil phutte chu an la phut reng thu an sawi.

MPCC thil phutte :

Pakhatna : Mizoram Sorkar hian State Assembly Special Session koin he amendment bill kan duh lohzia pass ngei se

Pahnihna : Mizoram kohhran, political party leh NGO hruaitute hi kan CM zahawmtak hian a ho ngeiin Delhi-ah Central Sorkar hotute hmuh puiin, he amendment bill kan duh loh thu hi thlen ni rawh se

Pathumna : Kan MP pahnihte hian he bill sawiho a nih hunah Mizo mipuite’n kan duh loh leh tha kan tih loh thu auh chhuahpui ngei se la. Ban phar a hunah pawh duh lo lamah phar ngei turin kan phut tlat a ni