MPSC-in result thar a ti chhuak

Mizoram Public Service Commission (MPSC) chuan vawiin (17.2.2026) hian MCS (Combined Competitive) Examination, 2025 final result a ti chhuak thar a, panel list-a awm pakhat a tling thar.

MPSC result tih chhuah tharah hian ni 9.2.2026 a result an tih chhuah tum a, 13-na nia MCS atana tling Samuel Chinsonmung s/o N Neihsial, Vengnuam, New Lamka, Manipur chu a awm tawh lo. 14-na chu 13-ah chhoin, 15-na chu 14-naah a chho thung. MCS atana tling sa ve ve an ni.

16-na nia MFAS atan tling Z Lalnghaktluanga s/o Sanghkhawma, Zotlang, Aizawl chu 15-naah chhoin, MCS atan a tling thar. A dang ho chu an position chhoin, an tlinna erawh a ngai. 21-na nia MIS tling GS Zoremtluangi d/o Lalnungenga, Electric Veng, Khawzawl chu 20-naah chhoin MFAS atan a tling thar.

Result tharah hian mi pakhat tling tharin, result tihchhuah hmasaka MIS panel list-a pakhatna Lalremsiami d/o Lalvuana, Armed Veng, Aizawl chu 29 niin MIS atan a tling thar. Panel list hrang hrang zingah mark hmu sang ber a nih vang a nih hmel.

Tarlan tawh angin MCS (Combined Competitive) Examination, 2025 ah hian MCS 15, MPS 8, MFAS 2 leh MIS 8 an tling.