MPSC member thar tur lakluh a ni

Mizoram Larsap General Vijay Kumar chuan vawiin (13.8.2026) Mizoram Public Service Commission (MPSC) member atan K. Lalrinzuali, IAS (Retd) chu Durbar Hall, Lok Bhavan-ah rinawmna thu tiam tirin a la lut.

Lakluhna inkhawmah hian Chief Secretary Khilli Ram Meena chuan Larsapin MPSC Member atana K. Lalrinzuali a ruatna notification a chhiar chhuak hmasa a, hemi hnu hian Larsap chuan rinawmna thutiam chham tirin K. Lalrinzuali chu MPSC member atan a lalut a ni.

He hunah hian Chief Minister Lalduhoma, Speaker Lalbiakzama, Home Minister K. Sapdanga, PWD Minister Vanlalhlana, AH& Vety. Minister C. Lalsawivunga, EF&CC Minister Lalthansanga, Health & Family Welfare Minister Lalrinpuii, Leader of Opposition Lalchhandama Ralte, P&E Minister F. Rodingliana, RD&A Minister Prof. Lalnilawma leh sawm bik mi pawimawh dangte an tel a ni.

K. Lalrinzuali July 11, 1966 ah piangin thiamna lamah Public Administration Gold Medalist a ni. Kum 1992 khan Mizoram Civil Service (MCS) a zawm a, kum 2019 ah IAS ah promote niin AGMUT Cadre 2010 pek a ni.

Mizoram Sawkara Commissioner & Secretary, Health & Family Welfare Department leh Power & Electricity Department hna a chelh laiin July 31, 2026 khan superannuation pension-in a chhuak a ni.

Tunah hian an chhungkuain Chawnpui Veng, Aizawlah an cheng mek a ni.