Aug 10, 2026
Monday
MZP bultumin vawiin (10.8.2026) hian Mizoram Public Service Commission (MPSC) kai tur an dang a, rei vak lo an innawr. Dan chhunzawm zel an tum.
Zirlaite chu zing dar 8 vel atangin MPSC office tualah an pungkhawm tan a, MPSC hotute office kal an tum avangin zirlaite leh police an innawr. An kal tak loh avangin buaina a chhuak zui loa, zirlaite erawh he thuziahlai thleng hian an la tindarh lo. MPSC office luhnaah ‘MPSC Siamthat Hnatlang’ tih an tar.
MZP President Dr. C Lalremruata chuan MZP hruaitute tumahin MPSC-ah hna an dil dawn loh thu sawiin, “Keimahni tana bei kan ni lo, kan zirlaipui leh thalaite tana bei kan ni. Tunhma atangin technical exam leh thil hrang hrangah MZP hruaituten kan Mizopui leh thalaipuiten an chanvo an chan theihna atan an lo bei tawh thin,” a ti.
Tunhnaiah, a bikin Mizo mipa social media-a tawngkam chhe tak taka tawng, hmaichhana sawi ngam lo tur an tam thu sawiin MZP President chuan, “Mi troll-te an ching. He hmalakna ti thuanawp zawnga hmalak tumte an awm,” Mizo mipa social media-a tawngkam chhe tinrenga hmang thinte chu a zahthlak vanga sim tura a duhthu a sawi.
Dr. C Lalremruata chuan Mizorama sorkar hnathawk lian zawng zawng latu siamthat a ngai tih hriat a ni chu a rilru nat thlak thu sawiin, “MPSC zahawmna, thalaiten kan rinna tlahniam ta hi a pawi. Chuvangin siamthat hnatlang kan ko. MPSC leh sorkarin kan thil duh a tih hlawhtlin hma chuan kan nawr zel dawn. Kan hlawhtlin loh chuan September thlaa MZP Assembly neih tur pawh kan nei lo ang,” a ti.
