News

MSU hruaitute chuan vawiin (8.6.2026) chawhma khan Chief Minister Pu Lalduhoma chu a pisaah an hmu a, Mizoram Public Service Commission (MPSC) hnalakah thil tihsual awm ṭhin chungchang te, hnam dang (vai) in Mizo hminga official document atana hming thlak chungchang leh BSF hnaruaka Mizoram quata hnamdangin document lem hmanga an zawm chungchang an thlen.

MSU hruaitute chuan Chief Minister hnenah hian MPSC inthlahdah avangin sawrkar hnalakah buaina a awm fo thin tih sawiin, tha lo an tih thu an thlen a, “Tun hnaia Jr. Grade of Legal Service hnalakah buaina thar a awm leh a pawi kan ti. Mizorama hnalakna kan neih chhun leh Group A Officer thlenga post sang zawk latu MPSC berin tihsual an nei ta fo hi ngaihzam a har,” tiin an ngaih thutak viau thu an sawi.

MSU chuan MPSC Chairman-in a hnuaia hnathawkte a vilṭha tawk loah an ngai a, bang ngam tura thurawn pe turin Chief Minister hi an ngen.
Tin, May 27, 2026 (Nilaini) Vanglaini chanchinbu chhuak phek 5-naah hnamdang (vai) Mizo hminga official document-a hman tur atana hming lo thlak an awm chungchang an thlen bawk. Hetia hnam dangin Mizo hminga hming an thlak fo chuan ILP exempt tumna leh tribal certificate neih tumna ṭha lo tak a hrinchhuah theih avangin tihtawp anih theih nana hma laksak turin an ngen a ni.

Hemi bakah BSF a Mizoram quata hnawhkhat tura document dik lo siamtu mi pariat tun thlenga man chhuah anla nih loh chungchang pawh thlen a, a ranglama Chief Minister hi hma laksak turin an ngen a ni.

Chief Minister chuan MSU te thil thlen chu pawimawh tak tak anih thu leh, theihtawpa Chief Minister aṭanga alo bawhzuisak tur thu a sawi a ni.