MUHCS 2.0 a pensioner-te dinhmun tihdanglam chhan sawifiah

Finance Secretary Ramchuana chuan vawiin (25.3.2026) hian a office-ah thuthar thehdarhtute kawmin, Mizoram Universal Health Care Scheme (MUHCS) 2.0 a pensioner-te dinhmun tihdanglam a nih chhan a sawifiah.

Ramchhuana chuan MUHCS 1.0 hnuaiah duhsak takin scheme siam sak an nih thu sawiin, “An association hruaitute nen kan sawiho hnuah an duhdan zulzuiin category A leh B ah then an ni. Category A chuan thla tin Rs. 1,000 thawhin kum khatah cheng nuai 12 thleng an inenkawl thei a, private cabin-ah an awm thei. Category B chuan thla khatah Rs. 500 thawhin, cheng nuai 5 thleng an bill thei a, semi private ward-ah an awm thei. Scheme tha tak siamsak an nih lai hian an zavaia zawm tura beisei an ni a mah se, pensioner mi 37,000 velah 10,400 vel chauhin an zawm a, hmun thuma thena hmun khat (1/3) pawn an zawm lo a ni. Tun dinhmunah hian Pensioner-te inenkawlna senso hi vbc. 26.84 tling tawhin dam lo pakhat tana senso chawhrualin pensioner-te hi an sang ber a ni. Hetih lai hian April 2025 atanga February 2026 thlenga pensioner-te sum thawhkhawm tling khawm chu cheng vbc. 9.33 a ni,” a ti.

Central Sawrkar hnuaia pensioner-te healthcare scheme (CGHCS) pawh zir chian a nih thu sawiin Finance Secretary sawi danin, CGHCS-ah hian pensioner-te sum lak luha innghat family member huamtir ni mah se, pensioner-te hian CGHCS an zawm dawn chuan fixed MA hi an pek kir (surrender) a ngai. Chumi hnuah an pension chhuahna pay level ațanga chhutin contribution an pe leh nghe nghe a ni, chu pawh chu thla 12 contribution tur kha vawi khatah an pe a ni.

Mizoram State Healthcare Society Governing Body Meeting, Chief Minister Chairman-na hnuaia February 16, 2026 chuan MUHCS 1.0 kan kalpui tawh dan leh MUHCS 2.0 kalpui dan turte a thlir a ni. Pensioner category bik dinhmunte enin leh a pumpui thua enrolment-te kan en hian pensioner category hnuaia enrolment hian beisei a phak lo hle a, ruahmanna tha tak siamsak an ni chunga zawmtu an tlem dan te ngaihtuahin leh CGHCS hnuaia pensioner an kalpui dante enin enrolment tam zawk kan neih theihna tur leh sawrkarin sum tam zawk a hmuh theihna turin MUHCS 2.0 ah chuan pensioner te hi General Contributory Beneficiary dinhmun ațanga lak hran hlawk tha tih a ni.

Chumi ang chuan Finance Department hian OM a chhuah ta a ni. Fixed MA erawh surrender kher loin an Fixed MA lak ang zat kha subscription fee-ah an hmang thung a, chu bak monthly contribution erawh pek belh a ngai tawh lo thung a ni.

MUHCS 1.0-ah khan pensioner-ten chhungkaw member an kep theih zat kha ration card-a awm ang ang, an tu leh fate nen lam huamtir vek a ni. Hei hi ngun taka ngaihtuah nawn niin, category dangte nen khaikhin chuan a khai rual lo hle. Sawrkar hnathawk zawkte pawh an chhungkaw member zawng zawng huamtir a nih loh laia pensioner-te chhungkua, ration card anga huamtir vek kha thil dik a ni lo. Sawrkar hnathawkte pawhin an thik hle a ni.

Hei vang hian MUHCS 2.0-ah chuan Pensioner-ten an nupui/pasal (Spouse) chauh an kep thei tawh dawn a ni.

Pensioner-te puala scheme kalpui tum dan hi pensioner lamin an duh lo a nih chuan pensioner-te puala scheme siam kher hi a țulin a lang lo. Mipui nawlpui anga General Contributory Beneficiary anga an zawm ve mai dan tur ruahman hi thil har lo te a ni. Chutihrual chuan FMA la bawk, MUHCS hlawkna dawn bawk a dual benefit neih hi a remin a lang lo. MUHCS hi scheme dang hmang an zawm dawn a nih chuan FMA a surrender a ngai dawnin a lang.