MUHCS 2.0 tlangzarh a ni

Vawiin (16.3.2026) chhun khan Chief Minister Lalduhoma chuan Assembly Annexe Conference Hall-ah kum 2026-2027 sorkar kum chhunga kalpui tur Mizoram Universal Health Care Scheme (MUHCS) 2.0 a tlangzarh.

Chief Minister chuan MUHCS kum khatna kha uluk taka zirchian a nih thu sawiin, “Sum leh pai pawh kan seng nual. Nimahsela mipuite tana a thatzia kan hmuhin sum leh pai senso hi tam tham deuh mahse insen zel kan huam. Tun budget tharah hian cheng vbc. 130 kan dah a, sorkar hnathawk contribution hi cheng vbc. 26.42 vel a ni. Asian Development Bank atangin cheng vbc. 800 chuang kan puk bawk a, MUHCS 2.0 hi a hma aia tha zawka kalpui kan tum a ni,” a ti.

Chief Minister hian, MUHCS kan kalpui mek danah emergency emaw nunna atana hlauhawm enkawlna pek kawngah empanelled damdawiin ni loa inenkawl theihna (provision) siam a nih thu sawiin, “He dan hi kan ennawn a MUHCS 2.0 ah hian khauh zawka kalpui kan tum. ICU a admit nghal ngai damlo, nunna chhan nana zai nghal ngai damlo leh accident vanga zai nghal ngai damlote chauh hi MUHCS hnuaia emergency/life threatening provision-in a huam tawh dawn a ni,” tiin MUHCS a hlawhtlin theihna atana thawktute a fak.

MUHCS 2.0 atana inziahluh hun hi April 15, 2026 thleng hawn a ni a, May chhung chu khar tur niin, June chhung khawngaihna hun (grace period) hawn a ni ang. Grace period-a inziahluh man erawh chu hun pangngai aiin inziahluh man 50% in a to dawn.