MUHCS hmangin min um chiai &#8211; Dr. Thangtea

Vawiin (27.5.2026) hian West Lungdar PWD IB-ah Dampa East MNF Block hruaitute infuihtharna neih a ni a, MNF Sr. Vice President Dr. R. Lalthangliana, bialtu MLA chuan a hmanpui a, party-in hma a lak dan tur hrang hrangte infuihtharna an nei.

Dr. R. Lalthangliana, Health Minister hlui chuan health care scheme neih ngei tha an tih thu sawiin, “Chuvangin, MNF Sorkarin bul kan tan nghe nghe kha a ni a, mipuite thlamuanna tura duan a ni. Mah se, tunah chuan sorkar hian MUHCS hmangin min um chiai mek zawk a ni. Inziahluhna man a sang a, mirethei zawkte tan phurrit nasa tak a tling. Mizoram Sorkar hnathawk MR Scheme tibovin an hlawh atanga cut luih sakin a zawm luihtir vek. Pensioner phei chuan rei tak sorkar an nawr a, tunah hian tihluihnain an zawm ringawt. Pensioner-te hian an nupui pasalte bak an kep thei ta lo a ni,” a ti.

MNF Sr. Vce President chuan iZokhawsanga insawn ta Assam Rifle-te MNF hmalakna avanga chhuak an ni tih mipuiin an hriat vek thu sawiin, “MNF Sorkarah AR ten MoU-ah phut an neihte chu Mizoram sorkar tan phurrit a nih avangin pumpelh tuma innawr tawn reng a ni a, an chhuah lawk loh phah chhan pakhat a ni. ZPM-in thuhnu dawn lovin MoU tha vak lo an rawn pawmpui a. a thlawna nitin tui litre nuai 4.5 (4,50,000 litres PHE rate angin thla tin a tlem berah ₹ 21,60,000 man hu) pek te, Zokhawsang ram a pulunga nei hlen thei tur ang hiala term tawp ruala automatic-a kum 99-dang nung zui tura tih te a tel. MNF Sorkar kal ta kha kan kuhmum that teh reng nen, ZPM-in a nih tur angin a par chhuahpui mumal thei ta lo,” tiin pawi a tih thu a sawi.