Jul 30, 2026
Thursday
Mizo Zirlai Pawl (MZP) chuan vawiin (30.7.2026) chhun I&PR Auditoruim-ah under graduate(UG) gold medalist chawimawina leh MZP chhungkua, MZU SC, Students’ Bar Council, college SU, hnampual hruaitu lawmpuina hun an hmang.
He hunah hian MZP President Dr C Lalremruata chuan Mizoram chhung leh pawnah pawh nise harsatna Mizoten kan neih chuan hma nasa taka MZP-in hma an lak thin thu sawiin, “Kan thil tih that hrang hrangte hre duh loa kan thil tih dik loh pakhat vanga sawiselna tam tak awm thin hi tha kan ti lo. Hruaitu hluiten ram leh hnam zirlaite tana thisen chhuak hiala an lo beihna pawh zahawm hle a ni,” a ti.
Ram leh hnamin chhan a ngaihna a piangah Zoram mipuiten khawnge MZP an tih thin thu sawiin Dr. C Lalremruata chuan, “Ramri buai, technical thil hrang hrang a zirlaite’n harsatna an tawhin, MZP a che chhuak thin. Kum 90 zet MZP-in a ram leh hnam zirlaite tana ke a penna kawngah tih dik tawklo leh tih fuh loh pawh a nei tawh ngei ang,” tiin chutihrualin, kan ram tana thil tha tam tak a lo tih tawhte hre reng turin zirlaite a chah.
He hunah hian gold medalist mi 4, SU rank holder 5 leh university leh college zirlai hruaitu hlawhtlinna chang mi 64 hnenah lawmpuina hlan a ni.
