MZP-in thuneitute an ngen nawn

MZP hruaitute chuan vawiin (23.2.2026) hian Aizawl Press Club-ah press conference neiin, Sairang thlenga rel rawn luh hnuah hnamdang (vai) rawng pungin, an zalen viau tih chiang takin a hmuh theih thu an sawi.

MZP hruaitute chuan College SU leh Hnampual hruaitute nen Aizawl khawpui chhungah, hnamdang dan loa rawn lut leh Inner Line Permit (ILP) nei felfai lote dap
chhuahna hun February 21, 2026 (Inrinni) khan an neih thu sawiin, “Thahnem tak man an ni. Hemi tum hian mi 90 te Mizoram Police-te hnehah pek an ni. Hun rei lote chhunga ILP checkna hunah hian, hmuhchhuah tam tak neih a ni a,
hnamdang leh hnamdang in sponsor te, mahni leh mahni in sponsor te, hnathawk tura kalte pawh lirthei (two wheeler) hmangin a tam zawk an kal tawh a, ke a kal check tur pawh an tlem hle. lirthei khalh a tam zawk an ni,” an ti.

An lirthei khalh hi a tam zawk Assam registration niin, learners license nen chauh a bungraw sem pawh an awm tih sawiin MZP hruaitute chuan, “A khat tawkin kum tin ILP check-na hun hi kan lo nei tawh thin a, thil lang chiang em em chu Sairang thlenga rel alo luh hnu hian, hnamdang (vai) hi an rawn pung a, an zalen viau tih chiang takin a hmuh theih a ni,” tiin sawrkar thuneitute hnenah pawh ILP chungchangah rawtna vawi tam a thlen tawh tih sawiin, hei aia khauh zawka kalpui anih theih nan thuneitute an ngen nawn leh.

Inner Line Pass pe chhuaktu lam pawh fimkhur zual tur leh dik lo taka an pekchhuah an hmuh chungchangah, a pe chhuaktu hrem a nih ngei theih nan a hma la tur thuneitute a ngenin MZP chuan, “Mizote hi chimral tham lek kan ni a, ILP check chungchangah hian a tul a nih chuan nasa takin hma kan la zel dawn a, Mizo hnamdang (vai) chhawr leh hlawkna um a vai sponsor leh an thlavang thin tun thlenga an la awm hi mak kan ti hle. Mahni hnam hralhtuah kan ngai .Mizoram Sorkar Gazette Notification No. F. 22015/1/2012-HM dt. 25th November, 2016 chuan self-sponsorship chu Non-Tribal Trade License holders neite tana an phalsak hi a mak kan em em a, he notification hi sut vat turin sorkar kan ngen. Chutiang bawkin Gazette No. F. 22015/1/2012-HM, the 11th August, 2017 na in Non Tribal Trade Licence holder-ten mi 5 thleng managers/helpers an sponsor thei hi tha kan ti lo a, he thupek pawh hi sut nghal turin thuneitute kan ngen a ni,” an ti.