N Vanlaiphai PHC-a thil thleng sawifiah

North Vanlaiphai PHC Staff Welfare Committee chuan tunhnaia social media-a video darh, North Vanlaiphai PHC a thawkte’n damlo ngaihsak loa, ring taka hla play-a an lam thu darh chungchangah a hnuaia tarlan ang hian thuchhuah an siam.

AN THUCHHUAH :

Social Media a N. Vanlaiphai PHC,-a thawktu hovin Advance Christmas an hmanga, nilenga thawm ring tak nei anga sawi hi dawt a ni. Hemi ni hian OPD pawh dar 1:00 PM thleng hawn a ni a. Advance Christmas program pawh hi dar 3:00 PM dawn ah ṭan chauh a ni.

Refer mai tura an ngen hnu a refer chauh anga sawi pawh hi dawt a ni a. Pi Kaprumi (80 yrs), Lungkawlh hi Dt. 3.12. 2025 (3:15 PM) ah admit a ni. Duh anga hma a sawn chak loh avangin Advance Christmas Program ṭan hmain chawhma 10:00 ah refer fel tawh a ni a, damlo attendant pawh hrilh an ni. Refer a nih veleh hian kalnghal mai loin 9:30PM ah damdawi in an chhuah san chauh a ni.

Hemi ni hian an kal chhuah theih hma zawng pawhin treatment a pangngai a kalpui vek a ni. Chawhnu lamah damlo hi buai ṭan anga sawi pawh thudik tawk lo a ni a. An kal dawn thlengin damlo vitals hi check a ni a, a ṭha vek a ni.

Thawm min tihzawih sak tura kan ngen pawh in min run luih sauh bawk a tih pawh hi dawt a ni. Damlo hi kan venthawn avangin ward a bengchheng a luh loh nan tukverh leh kawngkate pawh khar sak a ni a, mahse damlo awmpui tuten tukverh leh kawngkate pawh an rawn hawng leh ṭhin. Video an rawn post hi ruaiṭheh zawh inseng fel lai a ni a. An rawn complaint avangin woofer hi off nghal a ni.

Doctor chawp a rui hlawm anga sawi pawh hi dawt a ni a. Damdawi inah hian zu in ngai reng reng lo kohhran rawngbawltu fel tak takte pawh kan awm ve a ni. Hetianga damlo pawh dam taka a chhuah tawh hnuah social media-a a chhe thei ang ber a N. Vanlaiphai PHC doctor-te leh staff-te dawt a min puh hi kan rilru a na hle. Zoram mipuite thudik kan in hriattir a ni e. Thuneitute pawhin hetiang a dik lo taka social media-a dawt a intihmualphona hi a awm tawh lohna turin thil awmdan diktak chhui chianga, hrem ngai an awm a nih pawhin dan anga hremna pawh pe ngei turin kan ngen bawk e.