News

Vawiin (27.21.2025) hian Kolasib District Fast Track Court Judge R. Vanlalena chuan Vanlalruata (67), Kolasib chu hur sualna lam hawi a hmeichhe naupang kum 8 mi a lo khawih chingpen avangin kum 10 chhung tang tur leh Rs. 7,000 chawi turin a hrem.

January 15, 2019 khan hmeichhe naupang pakhat chuan a serh a nat thu leh putar pakhatin a serh a khawih sak thu a sawi chhuah avangin a pa, a tukah Kolasib Veng pakhata awm chuan Kolasib Police Station-ah FIR a theh lut a ni. He thil thlen hun lai tak hi naupang chuan sawi thei chiah tawh lo mahse kum 2018 laihawl vel kha nia hriat a ni.

He pawi khawihna hi Kolasib Police-te chuan chhuizui nghalin pawi khawihtu Vanlalruata chu an man a, Protection of Children from Sexual Offence Act, 2012 hmangin thubuai ziahluh a ni. Hmeichhe naupang hi doctor-in a endikna a hmuh danin hmeichhiat-mipat kaihhnawiha khawih chingpen ngei a ni.

Police-in thubuai chhui hna an thawh zawh hnuah report kimchang (chargesheet) chu Kolasib Fast Track Court-ah an thehlut a ni. Court chuan November 17, 2021 khan thubuai hi rel zo tawhin pawi khawihtu Vanlalruata chu kum 10 chhung Jail tang tur leh pawisa pawh Rs. 5000/- chawi turin a lo ti tawh a ni.

Thiam loh chantir tak Vanlalruata hian a chungchang thu Kolasib Fast Track Court rorel danah lungawi lovin Gauhati High Court, Aizawl Bench-ah a zualko a ni. Gauhati High Court, Aizawl Bench chuan he thubuai hi a bul te atanga rel tha leh vek turin Judge, Fast Track Court, Kolasib chu July 29, 2025 khan a hriattir a, thla 6 chhunga rel fel vek turin hun a pe.

He thubuai rel that leh a nih chhung hian thu hretu 7 thu zawh an ni. An zingah hian a chhuitu pahnih leh thuhretu dang naupang nu leh pa leh midangte bak ah Medical Officer, Aizawl lama sawn tawh chu biakhmuhtheih hmanga thu zawhfiah a ni.

Thuhretute thu sawi atang hian Judge R. Vanlalena chuan thu tlukna siamin, Vanlaruata chuan hmeichhe naupang kum tling lo chu hursualna lam hawiin lo khawih chingpen ngei tawh a ni, tiin thiam loh a chan tir ta a ni.