News

MSU chuan vawiin (29.4.2026) hian Dawrpui Multipurpose Hall-ah an kum 25 (silver jubilee) tlin an lawm a, an hun hmanpuitu Chief Minister Lalduhoma chuan Mizoram chu NGO nei tha ber pawl kan nih thu a sawi.

Chief Minister chuan Kan ramah NGO kan ngah a, a nei tha ber pawl kan nih thu sawiin, “Pawl hruaitute hian pawl thiltum sirah mahni hamhaina an lo kalpui lutuk hian thil fel lo a lo chhuak mai thin. Thiltum tha tak nei pawl in nih ang ngeiin in thiltumte ti hlawhtling tura theihtawp chhuah zel turin ka ngen che u a ni. Party leh party inkara thu inchuh a awm lai phei chuan NGO-ten ngawih an chuh thiamte pawh hi a tha fo. Kan tih tur leh kan tih loh tur hriat hi pawl zahawmna a ni,” a ti.

Zirlai pawlte hi hnam inpumkhatna kawngah an thawhhlawk thin thu sawiin Lalduhima chuan, “In chungah kan lawm hle. Tun hnaiah pawh Manipur-a Mizo nih duh ngai lo kan unau tam takten Mizo an nihna pawmin Mizo Integration Counci-te an din. Mizo chhunga hnam peng hrang hrangte tawng hmang hian Mizo tawng thar tam tak a indin chho mek a. A hlu hle a ni. Chin Hills lamah pawh kan inunauna hi sawi tam a tul hle,” tiin Mizote hi inpumkhat tura buatsaih mek kan nih thu a sawi.

Chief Minister chuan hun rei tak atang tawh khan MSU hruaitute’n sorkarah zirlaite Study Tour Budget ti sang turin an ngen thin tih sawiin, “Ka hnenah pawh an rawn sawi a, kumin budget-ah khan sorkar chuan zirlaite Study Tour Budget hi a leta ti pungin cheng nuai 100 dah thar a ni ta. Zirlai tam zawkte study tour-in an kal chhuak thei tawh dawn a ni. Tin, MSU hruaitute hian MSU Office hmun tur hi dapin sorkarah dilna an lo thlen tawh thin a, kan sorkar hian Ainawn Veng lamah in hmunhma tur kan teh fel thlap tawh a ni,” a ti.