News

Vawiin (1.6.2026) chhun khan Lunglei District DC Navneet Mann ruahmanna leh hmalaknaa Lunglei khawpui chhunga zirlai naupangte’n DC hna thawh dan a taka an hriatna tur leh mawhphurhna pawimawh la ngam tura fuih phurtu atana ruahman, “Be Deputy Commissioner for a Day 2.0” (Ni khat atan DC thawh hnihna) kalpui dan tur sawiho a ni.

Be DC for a Day hi nikum August 27, 2025 (Nilaini) khan a vawi khatna atan zirlai paruk thlan chhuahte nen hlawhtling taka kalpui niin, Lunglei District chhung BDO ṭhut hmunahte pawh “Be BDO for a Day” tiin kalpui chhunzawm a ni. Tunah hian a thawh hnihna atan Lunglei khawpui chhunga pawl 9 leh pawl 10 zirlai naupang sawm thlan chhuah leh niin, anni bakah hian hemia tel duh pawl 6–12 inkar zirlai pahnih dang tan tel ve theihna remchang (wildcard entry) ruahman tum a ni bawk.

Ruahman lawk dan chuan, June 17, 2026 (Nilaini) zing dar 9-ah DC lirthei hmangin zirlai thlan chhuah 12 te hian DC office thlengin, DC hna thawh dan hrang hrang hrilhfiah an ni ang. Chumi hnuah pindan hrang hrang fang kualin, thawktute nen an inkawm ang. Department hrang hrangte’n an hna thawh dan DC-a an report ngaithlain, thuthar thehdarhtute nena inkawm hona hun an hman bakah, hmasawnna hna thawh kal mek a hmunah an tlawh bawk ang.

He hma lakna hi Nasha Mukt Bharat Abhiyaan (NMBA) hnuaia ruihhlo hman khawlohna laka zirlaite ven himna tura ruahman niin, zirlaite’n DC office hna thawh dan leh nitina DC-in hun a hman dan te, department hrang hrang leh mipuite nena an indawr dan te an hriat a, hei hi an hma hun atana tum ruhna leh phurna petu atan leh an tum hlen tura ruihhlo laka fihlim a pawimawhzia an zir chhuahna atana tawn hriat pawimawh tak ni tura beisei leh ruahman a ni.