News

Vawiin (24.7.2026) hian Mizoram Govt. Adhoc-Aided High School Teacher’s Association (MIGAHTA) te chuan a ni 4-na atan sorkara provincialised an phut tih hlawhtlin a nih theih nan leh dinhmun hniam zawka dahna tur rules thar, The Mizoram Education (Lumpsum Grants-in-Aid for General Maintenance of Private School) Rules, duh loh lantir nan ‘No Teaching Day/Pen Down Strike’ neiin, lungawi lohna an lantir chhunzawm leh a ni.

Lungawi lohna hi Mizoram puma Adhoc-Aided High School 90 chuanga thawktute chuan an lan tir a; July 27 & 28, 2026 hian an lungawi lohna leh an thil phut tihhlawhtlin a nih theih nan mass casual leave lain lak an tum. Mass casual leave lak avanga a nghawng tur zirlaite leh mipuite hriatthiamna an dil rualin an thlawpna pawh an ngen nghal a ni.

MIGAHTA tarlan danin, Adhoc High School&te hi kum 30 kaltaa khawtlangin harsatna tam tak kara an lo din, lump sum atanga provincialise pawh ni vek tawh, chumi hnua ho lam taka provincialise atanga paih thlak leh te an ni.

Provincialise an nihna paih thlak an nih mai pawh duh tawk loa, tuna an dinhmun ai pawha hniam zawk, Lumpsum Grant-in-Aid dinhmuna dah hniam tumna awm leh zel hi an duh loin an dodal tlat.

Sorkar chu an dinhmunte hrethiam tur leh an zavaia provincialise leh vek turin khawngaihna an dilin an ngen tak zet a ni.

Sorkara kan thil phut hrang hrangte a hlawhtlin theihna tura an hmalaknaah hun eng emawti chhung chu zirna a khaihlak a nih pawhin a tuar tu zirlaite leh nu leh pa, khawtlang hriatthiamna an ngen.

Heng an hmalaknate hi khawtlang school dinhmun tlahniam turvenna leh thangthar hnazawngmekte hmakhua a ni tih min hriatsa turin an ngen bawk.